بھارت: کرناٹک میں حجاب پر پابندی کیخلاف احتجاج کرنیوالی درجنوں طالبات معطل
19 فروری ، 2022
بھارتی ریاست کرناٹک میں ایک اسکول نے حجاب پر پابندی کے خلاف احتجاج کرنیوالی طالبات کو معطل کردیا۔
بھارتی میڈیا کے مطابق جمعہ کے روز ریاست کرناٹک کے ضلع شیواموگا میں طالبات نے حجاب پر پابندی کے خلاف احتجاج کیا تھا۔
اسکول کے سامنے احتجاج کرنے والی 58 طالبات کا مطالبہ تھا کہ انہیں کلاس رومز میں باحجاب بیٹھنے کی اجازت دی جائے کیونکہ حجاب ان کا حق ہے اور وہ جان دے دیں گی مگر حجاب نہیں چھوڑیں گی۔
اسکول انتظامیہ نے احتجاج کرنیوالی ان تمام طالبات کو معطل کردیا ہے اور ان کی معطلی ختم ہونے تک طالبات کا اسکول کی حدود میں داخلہ بھی بند کردیا گیا ہے۔
اس کے علاوہ بھارتی میڈیا کا بتانا ہےکہ حجاب کیلئے احتجاج کرنے پر دیگر مظاہرین کو بھی گرفتار کیا گیا ہے جس میں جمعرات کے روز 9 لوگوں پر مقدمات درج کیے گئے، ان لوگوں نے حجاب پر پابندی لگانے پر کالج انتظامیہ کے خلاف احتجاج کیا تھا۔
