عدم اعتماد بیرونی سازش ہے جو ایم این ایز غلطی کر بیٹھے واپس آجائیں، وزیراعظم

وزیراعظم عمران خان کا کہنا ہےکہ تین غلاموں نے باہرکے لوگوں کے پاؤں پکڑ کر سازش کی، اب وقت آگیا ہے عوام فیصلہ کریں کہ وہ کدھر کھڑے ہیں، جو ایم این ایز غلطی کر بیٹھے واپس آجائیں، معاف کردوں گا، عوام کا پیسا دے کر حکومت بچانی ہے تو اس سے بہتر ہے حکومت چلی جائے۔

مالاکنڈ کے علاقے درگئی میں جلسے سے خطاب کرتے ہوئے وزیراعظم عمران خان کا کہنا  تھا کہ تین غلاموں نے باہرکے لوگوں کے پاؤں پکڑکر سازش کی، تینوں غلام میری بات سن لو ، تم میچ بری طرح ہارنے والے ہو ، 1992 کا ورلڈ کپ کھیلنےکے لیے آسٹریلیا جانے سے قبل میں کہتا تھا کہ ورلڈ کپ ہم جیتیں گے، میں کہنا چاہتا ہوں کہ یہ میچ بھی ہم جیتیں گے۔

ان کا کہنا تھا کہ درگئی کے باشعور نوجوان اس جماعت کے ساتھ چلیں گے جو پاکستان کے ساتھ ہے،  نوجوان اس جماعت کے ساتھ چلیں گے جو چوروں کے خلاف کھڑی ہے،  ہمارے سامنے دو راستے ہیں، ایک طرف نامور ڈاکو اکٹھے ہوگئے ہیں،دوسری طرف وہ لوگ ہیں جنھوں نے 25 سال ان ڈاکوؤں کے خلاف جدوجہد کی ہے۔

 وزیراعظم عمران خان کا کہنا  تھاکہ چوری کے پیسے سےلوگوں کو خریدنےکی کوشش کی جا رہی ہے، لوٹا ادھر چلا جاتا ہے جہاں اقتدار ہوتا ہے،جو ضمیر فروش ہوتا ہے پیسے لے کے ملک کا سودا کرتا ہے، قوم کے سامنے ضمیرکا سودا ہو رہا ہے،لوٹوں کو عدلیہ اور الیکشن کمیشن دونوں دیکھ رہے ہیں، سندھ ہاؤس میں ایم این ایز کو  بند کرکے جمہوریت کا جنازہ  نکالا  گیا، ضمیر فروش جمہوریت اور دین کا سودا کرتا ہے، اب وقت آگیا ہے آپ فیصلہ کریں کہ آپ کدھر کھڑے ہیں، اللہ نے ہمیں اچھائی کے ساتھ کھڑے اور برائی کے خلاف کھڑے ہونےکا کہا ہے۔

ایم این ایز کو چوری کے پیسے سے خریدنے کی کوشش کی گئی: وزیراعظم

 ان کا کہنا تھا کہ ہمارے ایم این ایز کو چوری کے پیسے سے خریدنے کی کوشش کی گئی،  ن لیگ والوں  تم نے آصف زرداری کو 2 بار جیل میں ڈالا، ن لیگ والوں  تم نے اپنے دور میں آصف زرداری پر کرپشن کے کیس بنائے، شہباز شریف نے پیٹ پھاڑ کر زرداری کا پیسا نکالنا تھا وہ چوری کا تھا ناں!

انہوں نے کہا کہ یہ تینوں ملک سے وہ کرنے جارہے ہیں جو دشمن بھی نہیں کرتا، آپ جتنا کہیں ضمیر جاگ گیا ،لوگوں نے نہیں ماننا، جو ایم این ایز غلطی کر بیٹھے واپس آجائیں ،معاف کردوں گا، مجھ سےکہا گیا کہ ایم این ایز کو خرید کر واپس لے آئیں، میں نےکہا مجھے آخرت کی فکر ہے،  منحرف ارکان سے کہہ رہا ہوں کہ اپنے بچوں کی خاطر یہ غلطی نہ کرنا۔

عمران خان نے کہا کہ  یہ اس ملک کی اخلاقیات تباہ کرنے جارہے ہیں، جب قوم کی اخلاقیات ختم ہوتی ہے تو قوم محنت کرنا چھوڑ دیتی ہے، پارٹی کا سربراہ باپ کی طرح ہوتا ہے میں آپ کی بھلائی کی بات کر رہا ہوں، آج کل سوشل میڈیا بہت مضبوط ہے، آپ کا شادیوں میں جانا مشکل ہوجائےگا، آپ کے بچوں سے لوگ شادیاں نہیں کریں گے، ہمارا کوئی بھی اہم این اے چوروں کو ووٹ دے گا اس کا مطلب آپ نے پیسے لیے، لوگوں کے خریدنے کے لیے یہ سندھ کی حکومت کا پیسا استعمال کر رہے ہیں، جس نے ووٹ بیچا اس کے ساتھ ضمیر فروش لگ جائےگا، نہ میں کسی کے سامنے جھکا نہ قوم کو جھکنے دوں گا، عوام کا پیسا دے کر حکومت بچانی ہے تواس سے بہتر ہے حکومت چلی جائے۔

یورپی یونین کے سفیروں نے پروٹوکول کے خلاف بات کی: وزیراعظم

 وزیراعظم  نےکہا کہ کسی سفیر کو حق نہیں پہنچتا کہ وہ دوسرے ملک کی خارجہ پالیسی پر بات کرے، یورپی یونین کے سفیروں نے پروٹوکول کے خلاف بات کی اور مطالبہ کیا کہ روس کے خلاف بیان دیں، میں نے ان سے صحیح پوچھا کہ کیا  آپ نے بھارت سے یہی مطالبہ کیا؟  ان کی جان جاتی ہےبھارت سے ایسا کہتے ہوئے، بھارت  نے ہمیشہ آزاد خارجہ پالیسی رکھی، امریکی پابندیوں کے باوجود روس سےتیل منگوا رہا ہے، ہم کوئی ان کے غلام ہیں کہ ہمیں کہاجائےکہ کسی کے خلاف بیان دیں!  میں نے یورپ کو کہا تھا کہ امن میں آپ کے ساتھ ہوں جنگ میں نہیں۔

انہوں نےکہا کہ دنیا میں پیٹرول اور ڈیزل کی قیمتیں اوپرگئیں ،ہم نے دس روپے فی لیٹرکم کی، ہمارا پیٹرول آج دبئی سے سستا ہے ، پانچ روپے فی یونٹ بجلی سستی کی، 10 روپے پیٹرول اور فضل الرحمان کو کم کیا، کسی حکومت نے وہ کام نہیں کئے جو ہم نے کیے۔