امریکا نے برمی فوج کی جانب سے روہنگیا مسلمانوں پر حملوں کو نسل کشی قرار دے دیا

واشنگٹن: امریکا نے 2016 اور 2017 کے دوران میانمار کی فوج کی جانب سے روہنگیا مسلمانوں پر حملوں کو نسل کشی قرار دے دیا۔

فرانسیسی خبر رساں ایجنسی (اے ایف پی) کے مطابق امریکی وزیر خارجہ انٹونی بلنکن نے کہا کہ 2016 اور 2017 کے دوران میانمار کی فو ج کی جانب سے روہنگیا مسلمانوں کیخلاف کارروائیاں نسل کشی کے زمرے میں آتی ہیں اور اس کے پیچھے مسلم اقلیت کو مٹانے کی نیت واضح تھی۔

تصاویر: ہزاروں مظلوم روہنگیا مسلمان بنگلہ دیش ہجرت پر مجبور

مہانمار سے ہزاروں پناہ گزین مسلمان ہجرت کرکے بنگلہ دیش کی سرحد پر بنائے گئے کیمپوں میں منتقل ہو رہے ہیں۔

امریکی وزیر خارجہ نے ہولوکاسٹ میموریل میوزیم میں گفتگو کرتے ہوئے مزید کہا کہ میں اس نتیجے پر پہنچا ہوں کہ برمی فوج روہنگیا مسلمانوں کی نسل کشی اور انسانیت سوز جرائم کی مرتکب ہوئی ہے۔

ان کا یہ بھی کہنا تھا کہ شواہد اس بات کو واضح کرتے ہیں کہ روہنگیا مسلمانوں کیخلاف کارروائیوں کا مقصد میانمار کی اقلیتی برادری کو مٹانا تھا۔

خیال رہے کہ 2017 میں پرتشدد کارروائیوں کا آغاز شمال مغربی ریاست راخائن میں اگست کے مہینے میں شروع ہوا جب درجنوں حملہ آوروں نے پولیس پوسٹوں اور ایک فوجی اڈے پر حملہ کردیا۔

بعدازاں سکیورٹی فورسز کی جانب سے جوابی کارروائیوں کے نتیجے میں کم از کم 400 افراد جاں بحق ہوئے جن میں اکثریت مسلمانوں کی تھی۔

میانمار میں سکیورٹی فورسز اور عسکریت پسندوں کے مظالم کے بعد ہزاروں مسلمان ملک چھوڑ کر بنگلا دیش ہجرت پر مجبور ہوئے جہاں وہ کیمپوں میں زندگی گزارنے پر مجبور ہیں۔