26 مارچ ، 2022 
گورنر سندھ نے ایم این اے جام عبدالکریم کی گرفتاری کیلئے ایف آئی اے کو خط لکھ دیا
26 مارچ ، 2022
کراچی:گورنر سندھ عمران اسماعیل نے رکن قومی اسمبلی جام عبدالکریم کے معاملے پر ڈی جی ایف آئی اے کو خط لکھ دیا۔
گورنر سندھ عمران اسماعیل نے ڈی جی ایف آئی اے کے نام خط میں پیپلزپارٹی کے رکن قومی اسمبلی جام عبدالکریم کا نام پی این آئی ایل (Provisional National Identification List) میں شامل کرنے کا مطالبہ کیا ہے۔
گورنر سندھ نے اپنے خط میں کہا کہ ایم این اے جام عبدالکریم ناظم جوکھیو قتل کیس میں مفرور تھے اور وہ قتل کیس کی ایف آئی آر میں نامزد ہیں۔
گورنر سندھ عمران اسماعیل نے خط میں کہا ہے کہ جام عبدالکریم کو وطن واپسی پر گرفتارکرکے متعلقہ عدالت میں پیش کیاجائے۔
واضح رہے کہ وفاقی وزیر داخلہ شیخ رشید نے بھی پریس کانفرنس میں کہا کہ عدم اعتماد کے لیے ناظم جوکھیو قتل کیس میں نامزد ملزم جام عبدالکریم کو دبئی سے ووٹ ڈالنے کے لیے بلایا جارہا ہے لیکن ہم انہیں پاکستان آمد پر گرفتار کریں گے۔
