رمیز راجہ کے گزشتہ 6 ماہ کے اخراجات سامنے آگئے

چیئرمین پاکستان کرکٹ بورڈ (پی سی بی) رمیز  راجہ کے گزشتہ 6 ماہ کے اخراجات سامنے آگئے۔

میڈیا پر خبریں چلنے کے بعد پی سی بی حرکت میں آگیا ہے اور چیئرمین پی سی بی رمیز راجہ کے 6 ماہ کے اخراجات کی تفصیل ویب سائٹ پر جاری کر دی گئی ہے۔

چیئرمین پی سی بی کے ستمبر 2021 کے بعد سے اخراجات سامنے نہ آ سکے

ستمبر 2021 میں بطور چیئرمین پی سی بی اپنی ذمہ داریاں سنبھالیں اور ان کے ستمبر میں ابتدائی دنوں کے اخراجات ویب سائٹ پر اپ ڈیٹ کیے گیے تھے

اعداد و شمار کے مطابق رمیز  راجہ نے 6 ماہ میں 39 لاکھ 17 ہزار روپے کی رقم خرچ کی، رمیز راجہ نے وہیکل الاؤنس کی مد میں 5 لاکھ 77 ہزار روپے سے زائد رقم خرچ کی، موبائل، سکیورٹی، میڈیکل کی مد میں 4 لاکھ 15 ہزار روپے لیے گئے۔

رپورٹ کے مطابق چیئرمین پی سی بی رمیز راجہ کے غیر ملکی دوروں پر 2 لاکھ 39 ہزار روپے سے زائد خرچ ہوئے، اندرون ملک سفر  پر 26 لاکھ 78 ہزار   985 روپے کے اخراجات ہوئے۔

پی سی بی کا کہنا ہے کہ اخراجات کی تفصیلات جاری کرنا یا نہ کرنا چیئرمین کا استحقاق ہے ۔

خیال رہے کہ رمیز  راجہ کے اخراجات اپ ڈیٹ نہ کرنے کے حوالے سے گزشتہ روز میڈیا پر خبرچلی تھی۔ خبر چلنے کے 24 گھنٹے کے بعد ہی پی سی بی نے اخراجات کی تفصیلات جاری کر دیں۔

چیئرمین پی سی بی کے اخراجات ویب سائٹ پر جاری کرنے کا سلسلہ سابق چیئرمین احسان مانی نے شروع کیا تھا۔