17 مئی ، 2022 
وزیراعلیٰ کے حلف کا کیس: ایڈووکیٹ جنرل پنجاب کو جواب داخل کرانے سے روک دیا گیا
17 مئی ، 2022
لاہور ہائیکورٹ میں وزیراعلیٰٰ پنجاب کے حلف کے خلاف انٹرا کورٹ اپیلوں پر ایڈووکیٹ جنرل احمد اویس کو پنجاب حکومت کی جانب سے جواب داخل کرنے سے روک دیا گیا۔
لاہور ہائیکورٹ میں حمزہ شہباز کے حلف سے متعلق سنگل بینچ کے فیصلوں کے خلاف تحریک انصاف کے ارکان کی اپیلوں پر پانچ رکنی بینچ نے 17 مئی کو سماعت کرنی ہے۔
عدالت نے ایڈووکیٹ جنرل پنجاب احمد اویس کو جواب داخل کرنے کی ہدایت کر رکھی ہے۔
احمد اویس نے جیو نیوز کو بتایا کہ عدالتی حکم کے تحت انہوں نے جواب پیر کو عدالت میں جمع کروانے کے لیے بھیجا لیکن ایڈیشنل ایڈووکیٹ جنرل جواد یعقوب نے اسے روک کر ضائع کرا دیا، وہ منگل کو عدالت کے روبرو پیش ہو کر جواب جمع کرا دیں گے۔
دوسری جانب تحریک انصاف کے وکیل اظہر صدیق ایڈووکیٹ سپریم کورٹ میں مصروفیات کے باعث آج لارجر بنچ کے سامنے پیش نہیں ہوں گے، ان کی جانب سے کیس ملتوی کرنے کی تحریری درخواست دی گئی ہے۔
