19 مئی ، 2022 
ایلون مسک کا آئندہ ٹرمپ کی پارٹی کو ووٹ دینے کا اعلان
19 مئی ، 2022
ٹیسلا اور اسپیس ایکس کے بانی ایلون مسک نے کہا ہے کہ وہ ماضی میں ڈیموکریٹک پارٹی کو ووٹ دیتے رہے ہیں مگر اب وہ ریپبلکنز کو ہی ووٹ دیں گے۔
ٹوئٹر پر ایک پیغام میں انہوں نے کہا 'ماضی میں ، میں ڈیموکریٹک پارٹی کو ووٹ دیتا رہا کیونکہ وہ ایک نیک دل پارٹی تھی، مگر اب وہ نفرت اور تقسیم پھیلانے والی پارٹی بنتی جارہی ہے، تو اب میں مزید اس کی حمایت نہیں کرتا اور ریپبلکن پارٹی کو ووٹ دوں گا'۔
ایک اور ٹوئٹ میں انہوں نے کہا کہ ان کے خلاف سیاسی حملوں میں آنے والے مہینوں میں ڈرامائی اضافہ ہوگا۔
دنیا کے امیر ترین شخص نے حال ہی میں کہا تھا کہ وہ ٹوئٹر کو خریدنے کے بعد سابق امریکی صدر ڈونلڈ ٹرمپ پر عائد پابندی کو ختم کردیں گے۔
ایلون مسک موجودہ امریکی صدر جو بائیڈن پر شدید تنقید کرتے رہے ہیں اور ڈیموکریٹس کی جانب سے ارب پتی افراد کے حوالے سے مجوزہ ٹیکس پروگرام کے مخالف ہیں ۔
ایک اور موقع پر ایلون مسک نے کہا تھا کہ وہ آئندہ انتخابات میں ریپبلکن پارٹی کو ووٹ دیں گے۔
انہوں نے اس موقع پر کہا تھا 'میں خود کو ریپبلکن یا ڈیموکریٹ کے بجائے معتدل پسند سمجھتا ہوں، میں ماضی میں پورے جذبے سے ڈیموکریٹس کو ووٹ دیتارہا اور کبھی ریپبلکن پارٹی کو ووٹ نہیں دیا، مگر اب انتخابات کے موقع پر میں ایسا کروں گا۔
