ابرار الحق کے گانے سے متعلق بھارتی میوزک کمپنی کا مؤقف سامنے آگیا

ابرارالحق کا مشہور گانا نچ پنجابن 2002 میں ریلیز کیا گیا تھا— فوٹو: فائل
ابرارالحق کا مشہور گانا نچ پنجابن 2002 میں ریلیز کیا گیا تھا— فوٹو: فائل

بھارت کی معروف میوزک کمپنی'T-Series' کا  پاکستانی گلوکار ابرار الحق کا گانا  نچ پنجابن کرن جوہر کی نئی فلم جگ جگ جیو میں استعمال کرنے کے حوالے سے بیان سامنے آگیا ہے۔

بالی وڈ کے معروف ہدایتکار کے  پروڈکشن ہاؤس دھرما نے اتوار کو اپنے سوشل میڈیا اکاؤنٹ پر فلم، جگ جگ جیو کا ٹریلر ریلیز کیا جس میں ابرارالحق کا 2002 میں ریلیز ہونے والا مشہور گانا نچ پنجابن مبینہ طور پر استعمال کیا گیا۔

بعد ازاں پاکستانی گلوکار ابرار الحق نے بالی وڈ کے مشہور ہدایتکار کرن جوہر اور ان کے پروٖڈکشن ہاؤس دھرما پر ان کی اجازت کے بغیر ماضی کا گانا 'نچ پنجابن' اپنی نئی فلم جگ جگ جیو میں چوری  کرنے کا الزام لگایا۔

 ابرارالحق نے ٹوئٹر پر بیان جاری کرتے ہوئے کہاکہ'میں نے اپنا گانا ’نچ پنجابن‘ کسی بھارتی فلم کو نہیں بیچا اور اس کے ہرجانے کے دعوے کے لیے میں عدالت جانے کا حق رکھتا ہوں'

تاہم اب T-Series نے اپنے سوشل میڈیا پر ایک بیان جاری کیا اور  ابرارالحق کے دعووں کو مسترد کرتے ہوئے  یقین دہانی کرائی ہے کہ T-Series نے 1 جنوری 2002 کو آئی ٹیونز پر ریلیز ہونے والے گانے نچ پنجابن کے حقوق قانونی طور پر حاصل کیے ہیں اور یہ لالی وڈ کلاسکس کے یوٹیوب چینل پر بھی دستیاب ہے جو کہ پنجابی گانوں کو  محفوظ کرنے والی کمپنی 1Moviebox کی ملکیت  ہے۔

تاہم اس سے قبل 1Moviebox نے بھی اپنا بیان جاری کیا تھا کہ نچ پنجابن کو TSeries کی طرف سے فلم جگ جگ جیو میں شامل کرنے کے لیے باضابطہ طور پر لائسنس دیا گیا ہے۔کرن جوہر اور دھرما موویز کو اس گانے کو اپنی فلم میں استعمال کرنے کا قانونی حق حاصل ہے اور ابرارالحق کی جانب سے   کی گئی ٹوئٹ توہین آمیز اور مکمل طور پر ناقابل قبول ہے۔

دوسری جانب ابرارالحق نے دوبارہ ٹوئٹ کرتے ہوئے کہا کہ 'گانے ’نچ پنجابن‘ کا لائسنس کسی کو نہیں دیا گیا۔ اگر کوئی دعویٰ کر رہا ہے تو معاہدہ پیش کریں ورنہ میں قانونی کارروائی کروں گا'۔

واضح رہے کہ کرن جوہر کے پروڈکشن ہاؤس کے بینر تلے بننے والی فلم جگ جگ جیو میں ورن دھون،انیل کپور، کائرہ ادواری اور نیتو سنگھ اداکاری کرتے نظر آئیں گے۔

مزید خبریں :

Notification Management


پاکستان
دنیا
کاروبار
کھیل
انٹرٹینمنٹ
صحت و سائنس
دلچسپ و عجیب

ڈیسک ٹاپ نوٹیفکیشن کے لیے سبسکرائب کریں
Powered by IMM