دنیا

گلیشیئر پگھلنے پر نیپال کا ماؤنٹ ایورسٹ کا بیس کیمپ منتقل کرنے کا فیصلہ

17 جون ، 2022

ماؤنٹ ایورسٹ کے بیس کیمپ کا ایک منظر / رائٹرز فوٹو

موسمیاتی تبدیلیوں اور انسانی سرگرمیوں نے نیپال کو دنیا کی بلند ترین چوٹی ماؤنٹ ایورسٹ کے بیس کیمپ کا مقام بدلنے کے فیصلے پر مجبور کردیا ہے۔

نیپال اور چین کی سرحد پر واقع ماؤنٹ ایورسٹ کے دونوں ممالک میں الگ الگ بیس کیمپس ہیں۔

دونوں میں سے نیپال میں موجود بیس کیمپ کوہ پیماؤں میں زیادہ مقبول ہے جو ایک گلیشیئر کھمبو میں واقع ہے، جہاں ہر سال سیکڑوں افراد آتے ہیں۔

یہ بھی پڑھیں

اب موسمیاتی تبدیلیوں اور انسانی سرگرمیوں کے نتیجے میں یہ گلیشیئر بہت تیزی سے پگھل رہا ہے۔

نیپالی حکام اس بیس کیمپ کو 400 میٹر نیچے منتقل کرنے کی منصوبہ بندی کررہے ہیں۔

نیپال کے محکمہ سیاحت کے ڈائریکٹر تارا ناتھ ادھیکاری نے بتایا کہ ہم ماؤنٹ ایورسٹ پر موجود برف کو بچانا چاہتے ہیں۔

حکومت کی جانب سے نئے اور محفوظ مقام کی تلاش کے لیے ماہرین ماحولیات، کوہ پیماؤں اور مقامی افراد سے مشاورت بھی شروع کردی گئی ہے۔

تارا ناتھ نے بتایا کہ انہیں نہیں لگتا کہ بیس کیمپ نیچے منتقل کرنے سے کوہ پیماؤں کو چوٹی سر کرنے میں مشکلات کا سامنا ہوگا۔

مگر اس بیس کیمپ کو منتقل کرنے میں ابھی کچھ وقت لگ سکتا ہے / اسکرین شاٹ

ان کا کہنا تھا کہ اس سے چوٹی سر کرنا مشکل نہیں ہوگا بلکہ کوہ پیماؤں اور ماؤنٹ ایورسٹ کے ماحول کو زیادہ تحفظ ملے گا۔

مگر انہوں نے کہا کہ بیس کیمپ کی منتقلی جلد ممکن نہیں۔

ایورسٹ بیس کیمپ کے منیجر شیرنگ ٹینزنگ شیرپا کے مطابق بیس کیمپ کو منتقل کرنے میں چند سال لگ سکتے ہیں۔

انہوں نے کہا کہ موسمیاتی تبدیلیوں کے باعث گلیشیئر تیزی سے پگھل رہے ہیں مگر بیس کیمپ محفوظ ہے اور ہمیں نہیں لگتا کہ چند سال تک اسے بدلنے کی ضرورت ہوگی۔