دو حمل ضائع اور 3 مرتبہ بے اولادی کے علاج سے گزری ہوں: نادیہ افگن

پاکستان کی مایہ ناز اداکارہ نادیہ افگن نے نجی ٹی وی کے پروگرام میں دیے گئے اپنے بیان کی وضاحت پیش کی ہے۔

کچھ روز قبل نادیہ افگن نے ایک پروگرام میں شرکت کی تھی جہاں انہوں نے کہا تھا کہ ان کے پاس دو کتے ہیں، وہ دنیا کے سارے بچوں کو اپنا بچہ سمجھتی ہیں چونکہ ان کے بچے نہیں ہیں۔

اداکارہ نے یہ بھی کہا تھا کہ آج کل کے دور میں بچوں کی پرورش کرنا بے حد مشکل ہے۔

بچوں کی خواہش نہیں کیونکہ دنیا میں بہت سے بچے ہیں: اداکارہ نادیہ

اداکارہ حال ہی میں نجی ٹی وی کے ایک پروگرام میں شریک ہوئیں جہاں انہوں نے کیرئیر سمیت اپنی نجی زندگی کے حوالے سے بھی بات کی

تاہم نادیہ کے انٹرویو کے ویڈیو کلپس سوشل میڈیا پر وائرل ہوئے تو لوگوں نے اسے غلط انداز سے لیا اور اداکارہ کو سخت تنقید کا نشانہ بنایا جس کے بعد انہوں نے 16 جون کو انسٹاگرام پر وضاحتی پوسٹ شیئر کی۔

نادیہ افگن کی وضاحت:

اداکارہ نے اپنی پوسٹ میں لکھا کہ 'میں نے فیصلہ کیا تھا میں اس بارے میں کبھی عوامی سطح پر بات نہیں کروں گی کیونکہ یہ انتہائی تکلیف دہ بات ہے لیکن اب مجھے وضاحت دینے کی واقعی ضرروت ہے'۔

نادیہ نے کہا کہ 'وضاحت کی ضرورت اس لیے ہے کہ ہمارے سوشل میڈیا انفلوئنسرز غیر ضروری مصالحہ پسند کرتے ہیں لیکن مجھے یہ دیکھ کر دھچکا لگا کہ میرے ذاتی بیان پر خواتین نے بھی سخت ردعمل دیا۔'

انہوں نے کہا کہ 'مجھے اس بات پر مکمل یقین تھاکہ خواتین، چاہے ان کے بچے ہوں یا نہ ہوں، جانتی اور سمجھتی ہوں گی کہ یہ معاملہ کتنا پیچیدہ اور سنجیدہ ہے، میں سوچتی تھی کہ خواتین سمجھتی ہوں گی کہ یہ سفر کس حد تک مشکل ہوسکتا ہے لیکن گزشتہ کچھ دنوں نے مجھے بتایا کہ میں کتنی غلط تھی کیونکہ مجھے خواتین نے بھی تنقید کا نشانہ بنایا‘۔

نادیہ نے انکشاف کیا کہ '15 سال کی شادی میں میرے دو دفعہ استقاطِ حمل ہوئے، تین بار میں بے اولادی کے سخت اور مشکل علاج سے گزری، پرورش سے قبل دو بچوں کو کھونا میرے لیے تکلیف دہ تھا جس کے بعد میں ڈپریشن سے بھی گزری، ہارمونز کے مسائل کی وجہ سے میرا وزن بھی بڑھ گیا'۔

اداکارہ نے کہا کہ 'اس سارے سفر میں میرے شوہر نے مجھے بے پناہ سپورٹ کیا، انہوں نے ذہنی طور پر میرا ساتھ دیا اور میری حالت کو سمجھا'۔

نادیہ افگن کی وضاحتی پوسٹ پر شوبز سے منسلک شخصیات نے ان سے اظہارِ ہمدردی کیا اور ان کے لیے نیک خواہشات کا بھی اظہار کیا۔