دعا زہرا کے والد نے اپنی روتی ہوئی ویڈیو سامنے آنے پر کیا کہا؟
21 جون ، 2022
گزشتہ روز فادرز ڈے کے موقع پر روتی ہوئی وائرل ویڈیو سے متعلق دعا زہرا کے والد مہدی علی کاظمی نے رد عمل کا اظہار کیا ہے۔
عدالت آمد کے موقع پر مہدی علی کاظمی کا ایک ویڈیو بیان وائرل ہورہا ہے۔
صحافیوں نے گفتگو کرتے ہوئے مہدی کاظمی سے وائرل ویڈیو سے متعلق سوالات کیے جس کےجواب میں انہوں نے کہا کہ کل چونکہ فادرز ڈے تھا اور میں ایک انسان بھی تو ہوں تو وہ میرے لیے جذباتی لمحات تھے۔
انہوں نے کہاکہ عدالت میں اپنی بیٹی اور پاکستان کو درپیش ایک مسئلے کی فائٹ کے لیے آتا ہوں تو لہٰذا سب مجھے یہاں ایسے ہی دیکھیں گے۔
یاد رہے کہ گزشتہ روز فادرز ڈے کے روز مہدی کاظمی کی بیٹی کی یاد میں روتے ہوئے ایک ویڈیو وائرل ہوئی تھی۔
خیال رہے کہ 8 جون کو سندھ ہائیکورٹ نے دعا زہرا کیس کا تحریری حکم نامہ جاری کرتے ہوئے دعا کو اپنی مرضی سے فیصلہ کرنے کی اجازت دی تھی۔
