طالبان کے دو اعلیٰ عہدے داروں کے بیرون ملک سفر پر پابندی عائد

اقوام متحدہ نے طالبان کے وزیر برائےاعلیٰ تعلیم عبدالباقی حقانی اور نائب وزیر تعلیم سید احمد شادخیل کا سفری استثنیٰ ختم کر کے بیرون ملک سفر پر پابندی عائد کر دی۔

غیرملکی خبر ایجنسی سے گفتگو میں اقوام متحدہ کے سفارت کاروں کا کہنا تھا کہ سفری پابندیاں طالبان حکومت کی جانب سے افغان خواتین پر سخت پابندیاں عائد کرنے کی وجہ سے لگائی گئی ہیں۔

امریکا کا ٹرمپ دور میں طالبان پر عائد سفری پابندیوں میں دیے گئے استثنیٰ میں توسیع پر غور

ٹرمپ دور میں بعض طالبان اہلکاروں کو بیرون ملک سفر کی اجازت دی گئی تھی تاہم گزشتہ روز طالبان اہلکاروں کیلئے سفری پابندیوں میں دیا گئے استثنیٰ کی مدت ختم ہوگئی ہے۔

15 طالبان عہدیداروں کے مذاکرات کیلئے بیرون ملک جانے کے سفری استثنیٰ کی مدت کل ختم ہوئی ہے، اقوام متحدہ نے باقی کے 13 طالبان عہدیداروں کیلئے سفری استثنیٰ میں کم از کم 2 ماہ کی توسیع کر دی ہے۔

افغان نائب وزیر برائے اعلیٰ تعلیم لطف اللہ خیرخواہ نے اقوام متحدہ کے فیصلے پر تنقید کرتے ہوئے اسے سطحی اور  غیرمنصفانہ قرار دیا اور کہا کہ ایسے فیصلے صورتحال کو مزید نازک بنا دیں گے۔

خیال رہے کہ طالبان حکومت نے مارچ میں لڑکیوں کے سیکنڈری اسکولز بند کروا دیے تھے جو اب تک نہیں کھولے گئے۔