27 جولائی ، 2022 
پختونخوا میں بچیوں سے زیادتی پر سرعام پھانسی دینے کا مطالبہ
27 جولائی ، 2022
خیبر پختونخوا اسمبلی میں بچیوں سے زیادتی کے ملزمان کو سرعام پھانسی دینے کا مطالبہ سامنے آیا ہے۔
بچیوں سے زیادتی کے کیسز پر خیبر پختونخوا اسمبلی میں تحریک التواء پر بحث کے دوران جے یو آئی کی رکن اسمبلی نعیمہ کشور نے کہا کہ کمیٹیاں بنتی ہیں مگر اس کی روک تھام کے لیے عملی اقدامات نہ ہونے کے برابر ہیں۔
نعیمہ کشور نے کہا کہ زیادتی کے کیسز میں ڈی این اے ٹیسٹ پنجاب میں کیا جاتا ہے۔
مسلم لیگ ن کے اختیار ولی نے کہا کہ قرارداد پاس کرکے بچیوں سے زیادتی پر سرعام پھانسی دی جائے۔
صوبائی وزیر شوکت یوسفزئی نے کہا کہ بچوں کے ساتھ زیادتی کرنے والے کسی رعایت کے مستحق نہیں، وزیراعلیٰ محمود خان سے بات کرکے پولیس کو کہیں گے کہ رات 8 بجے کے بعد بچوں کو کسی چوک پر پھرنے کی اجازت نہ دیں۔
