انتہائی مشکل وکٹ پر ٹاس جیت کر پہلے بیٹنگ کیوں کی؟ فخر زمان نے وجہ بتا دی

قومی ٹیم کے جارح مزاج بیٹر فخر زمان نے نیدر لینڈ کے خلاف پہلے میچ اور وکٹ کی کنڈیشن سے متعلق گفتگو کی ہے۔

پاکستان کرکٹ بورڈ کی جانب سے سوشل میڈیا پر پہلے میچ میں گرین شرٹس کی جیت میں اہم کردار ادا کرنے والے بیٹر فخر زمان کی ایک ویڈیو شیئر کی ہے۔

فخر زمان کا کہنا ہے ٹاس سے پہلے ہی ہمیں پتہ تھا کہ وکٹ مشکل ہے اور اس پر نمی بھی ہے لیکن یہی پلان ہوا اور بابر اعظم نے بھی یہی بات کی اگر اس کنڈیشن میں بھی ہم چانس نہیں لیں گے اور کنڈیشن کے خلاف نہیں کھیلیں گے تو پھر کہاں کھیلیں گے۔

انہوں نے مزید کہا کہ ہمیں پتہ بھی تھا کہ بہت زیادہ مشکل وکٹ ہے لیکن بابر نے کہا کہ ٹاس جیت کر پہلے بیٹنگ اس لیے کریں گے کہ ہمیں ٹف صورتحال ملے کیونکہ ہمیں مستقبل میں کہیں پر بھی مشکل وکٹ اور اس قسم کی کنڈیشن مل سکتی ہے، ورنہ میرے خیال میں کوئی بھی ٹیم اس طرح کی وکٹ پر ٹاس جیت کر بیٹنگ نہیں کرے گی۔

پہلا ون ڈے: پاکستان نے سنسنی خیز مقابلےکے بعد نیدرلینڈز کو 16 رنز سے شکست دے دی

پاکستان نے پہلےکھیلتے ہوئے مقررہ 50 اوورز میں 6 وکٹ کے نقصان پر 314 رنز بنائے تھے

جارح مزاج بیٹر کا کہنا تھا کہ آہستہ اس لیے کھیلے کیونکہ وکٹ پر نمی بہت زیادہ تھی اور کنڈیشن ایسی تھی کہ پورا دن وکٹ پر سورج لگا ہی نہیں تھا، شروع میں جب وکٹ پر گئے اور وکٹ کو دیکھا تو اسی وقت اندازہ ہو گیا تھا کہ اس وکٹ پر رن نہیں بنیں گے، میری اور بابر کی یہی بات ہوئی کہ اگر 25 اوور تک وکٹ نہ گری تو ہم 300 تک جا سکتے ہیں اور ہمارا یہی پلان کام کر گیا۔

فخر زمان نے کہا کہ ایسی مشکل صورتحال میں بہت کم بیٹنگ کی ہے لیکن میں خوش قسمت بھی تھا کہ میرا کیچ بھی چھوٹا، سب سے زیادہ خوشی اس بات کی ہے کہ میرے 100 کی وجہ سے ٹیم میچ جیت گئی۔

ان کا کہنا تھا جو بھی ہو لیکن نیدرلینڈ کے بولرز نے اپنی کنڈیشن کو بہت اچھا استعمال کیا اور میرے خیال میں اس میچ کا سب سے زیادہ کریڈٹ انہیں ہی جاتا ہے۔

قومی بیٹر نے مزید کہا کہ ابھی ہمیں کنڈیشن کا اندازہ بھی ہو گیا ہے اور ہالینڈ کی جس طرح کی ٹیم ہے انہیں ہمیں بڑے مارجن سے ہرانا چاہیے، اگلے دو میچز میں ہم مخالف ٹیم کو بڑے مارجن سے ہرانے کی پوری کوشش کریں گے۔

فخر زمان نے کہا کہ اس میچ میں ہمارے لیے بہت سی اچھی چیزیں بھی سامنے آئیں، دو کھلاڑیوں نے ون ڈے ڈیبیو کیا جس سے ہمیں اپنی اسٹرینتھ کا بھی پتا چلا، سلمان علی آغا نے آخر میں اچھے رنز کیے جبکہ نسیم شاہ سپر ٹیلنٹڈ لڑکا ہے، یقین ہے کہ وہ مستقبل میں پاکستان کا سپر اسٹار بنے گا۔

یاد رہے کہ گزشتہ روز پاکستان نے تین ایک روزہ میچوں کی سیریز کے پہلے میچ میں نیدرلینڈ کو دلچسپ مقابلے کے بعد 16 رنز سے شکست دی تھی۔