18 اگست ، 2022 
شہباز گل کو دل کی تکلیف نہیں، ان کی صحت تسلی بخش ہے: پمز اسپتال
18 اگست ، 2022
وفاقی دارالحکومت اسلام آبادکے پمز اسپتال نے پاکستان تحریک انصاف کے رہنما شہباز گل کی صحت تسلی بخش قرار دیتے ہوئے کہا کہ انھیں دل کی تکلیف نہیں ہے۔
گزشتہ روز شہباز گِل کو اڈیالہ جیل سے میڈیکل چیک اپ کے لیے پمز اسپتال کے آئی سی یو میں منتقل کیا گیا تھا اور ان کے چیک اپ کے لیے اسپتال میں ڈاکٹرز کا 5 رکنی میڈیکل بورڈ تشکیل دیا گیا ہے۔
کارڈیک سینٹر میں شہباز گل کا ابتدائی طبی معائنہ ہوا اور اسپتال ذرائع کے مطابق پی ٹی آئی رہنما کی صحت تسلی بخش ہے۔
اسپتال ذرائع کا کہناہے کہ شہباز گل کےخون کے ٹیسٹ اور ای سی جی کی گئی، شہبازگل کے دل کی دھڑکنیں رات تیزتھی، ان کی گزشتہ رات ای سی جی رپورٹ بہترنہیں تھی لہٰذا ان کی دوبارہ ای سی جی کی جائے گی ۔
اسپتال ذرائع کا کہنا ہے کہ بے چینی بڑھنے سے بھی دل کی دھڑکنیں تیزہوجاتی ہیں اور سانس لینے میں مشکلات آجاتی ہیں تاہم انھیں دل کی تکلیف نہیں ہے۔
اسپتال ذرائع کا کہنا ہے کہ میڈیکل بورڈ شہبازگل کا آج دوبارہ معائنہ کرے گا جس دوران شہبازگل کے دوبارہ ٹیسٹ کیے جانے کا بھی امکان ہے۔
ذرائع کا مزید کہنا تھا کہ رہنما پی ٹی آئی کی مجموعی میڈیکل رپورٹ آج مرتب کی جائے گی جس کے بعد شہباز گل کو ڈسچارج کرنے یا نا کرنے سے متعلق فیصلہ کیا جائےگا۔
دوسری جانب شہباز گل کے فیس بک اکاؤنٹ سے جاری بیان میں ان کے وینٹی لیٹر پر ہونے کا دعویٰ کیا گیا ہے۔
پی ٹی آئی رہنما شہباز گل کے تصدیق شدہ فیس بُک اکاؤنٹ سے ان کی اسٹریچر پر پمز اسپتال منتقل کرنے کی ایک ویڈیو شیئر کی گئی اور ساتھ ہی یہ دعویٰ کیا گیا ہے کہ وہ وینٹی لیٹر پر ہیں۔
ساتھ ہی یہ بھی بتایا گیا ہے کہ شہباز گِل کا منہ سوجا ہوا تھا، اور انہیں سانس بھی نہیں آرہا تھا۔
