20 اگست ، 2022 
بلوچستان کے دورے میں وزیراعظم سے پڑھائی کا کہنے والے بچے کا لارنس کالج میں داخلہ ہوگیا
20 اگست ، 2022
بلوچستان میں سیلاب سے متاثرہ علاقوں کے دورے کے دوران وزیراعظم شہباز شریف سے پڑھائی کا کہنے والے بچے کا لارنس کالج مری میں داخلہ کرا دیا گیا۔
ن لیگ کی نائب صدر مریم نواز کے پولیٹیکل سیکرٹری ذیشان ملک کا کہنا ہے کہ وزیراعظم شہباز شریف نے بچے سے اعلیٰ تعلیم کا جو وعدہ کیا تھا وہ وفا بھی کیا۔
انہوں نے کہا کہ لارنس کالج مری میں داخلے سے بچے کے نئے تعلیمی سفر کا آغاز ہوچکا ہے اور یہ بچہ اعلیٰ تعلیم حاصل کرکے ملک و قوم کا نام روشن کرے گا۔
خیال رہے کہ گزشتہ دنوں وزیراعظم شہباز شریف نے وزیراعلیٰ بلوچستان میر عبدالقدوس بزنجو اور وفاقی وزرا کے ہمراہ بلوچستان کے سیلاب سے متاثرہ علاقوں کا دورہ کیا تھا۔
شہباز شریف قلعہ سیف اللہ پہنچے تھے جہاں ایک بچے نے وزیر اعظم سے اپنے علاقے میں ناقص تعلیم کے نظام کی شکایت کی تھی۔
بچے نے کہا تھاکہ 'یہاں تعلیم کا مسئلہ ہے، سرکاری اسکول میں اگر ہم جائیں تو وہاں اساتذہ نہیں آتے، اپنی نوکری ٹھیک طرح سے نہیں کرتے اور وقت پر آتے بھی نہیں ہیں'۔
وزیر اعظم نے سوال کیا کہ 'بیٹا اب تک جو تعلیم حاصل کی، کیا وہ گھر میں کی ہے؟'
طالب علم نے بتایا کہ 'تھوڑا ٹیچر کی مدد سے کی اور کچھ ٹیوشن پر جاتا تھا'۔
شہباز شریف نے کہا 'اس بچے کو اعلیٰ تعلیم دلوائی جائے، جہاں یہ بچہ چاہے اسے داخلہ دلوایا جائے، اسے مفت تعلیم فراہم کی جائے گی'۔
