سیہون کی 5 یونین کونسلیں ڈوبنے کا خدشہ، مکینوں نے نقل مکانی شروع کر دی

پاکستان کی سب سے بڑی منچھر جھیل میں پانی کی سطح بلند ہونے سے بند ٹوٹنے کا خطرہ ہے جس سے سیہون کی 5 یونین کونسلیں ڈوبنے کا خدشہ ہے اور  سیلابی صورتحال کے پیش نظر مکینوں نے نقل مکانی شروع کر دی ہے۔

 منچھر جھیل میں تیز ہواؤں سے لہریں بلند ہونے لگی ہیں جس کے باعث بند پر دباؤ بڑھ گیا ہے اور جھیل کا پانی کناروں سے چھلکنے لگاہے، پانی اب دانستر  ریگولیٹر کے دروازوں کے اوپر سے گزر رہا ہے۔

منچھر جھیل کا بند ٹوٹنےکا خطرہ، قریبی آبادیاں خالی کرنےکے احکامات جاری

جھیل کا بندکسی بھی وقت ٹوٹنےکا خدشہ ہے، یونین کونسل واہڑ، بوبک، جعفرآباد اور یونین کونسل چنا کے علاقے خالی کیے جائیں، ڈپٹی کمشنر جامشورو

ادھر میہڑ اور جوہی شہر کے رنگ بندوں پر بھی پانی کا دباؤ بڑھ گیا ہے، شہری بوریوں میں مٹی بھر بھر کر بندوں کو مضبوط کرنے میں مصروف ہیں۔

مٹیاری کے قریب روہڑی کینال کے مقام چھنڈن شاخ کا ٹوٹنے والا گیٹ کئی گھنٹے بعد بھی نہ بن سکا، چھنڈن شاخ پانی سے بھرگئی اور 4 مقامات پر اس سے پانی باہر نکلنے لگا ہے جبکہ انتظامیہ کی جانب سے پانی دریائے سندھ میں ڈالنےکے لیے مشینیں لگا دی گئی ہیں۔ 

چھنڈن شاخ میں شگاف سے مٹیاری شہر سمیت قومی شاہراہ زیر آب آنے کا خدشہ ہے۔