رضوان بھی بابر ہے، T20رینکنگ میں بیٹے کی جگہ لینے پر کپتان کے والد کا ردعمل

پاکستان کرکٹ ٹیم کے کپتان بابر  اعظم کے والد اعظم صدیقی کا کہنا ہے کہ ان کے لیے ٹیم کے سارے کھلاڑی بیٹے بابر جیسے ہیں۔

سوشل میڈیا پر اعظم صدیقی کا افغانستان کے خلاف فتح کے بعد میڈیا سے گفتگو کا ایک کلپ وائرل ہو رہا ہے جس میں انھوں نے ٹیم کے کھلاڑیوں سمیت وکٹ کیپر بیٹسمین محمد رضوان کے ٹی ٹوئنٹی رینکنگ میں بابر اعظم کی جگہ پر لینے پر بات کی۔

افغانستان کے خلاف جیت پر خوشی کا اظہار کرتے ہوئے اعظم صدیقی کا کہنا تھا میں نے یہ بات پہلے بھی واضح کی تھی کہ پاکستان کے 11 کے 11 کھلاڑی بابر ہیں، اللہ کے فضل سے ورلڈکپ تک جیت کا یہ سلسلہ دراز  رہے گا۔

بابر کی ایشیا کپ میں پرفارمنس کے سوال پر اعظم صدیقی نے کہا کہ کوئی بات نہیں، بابر میں جو بھی کمی ہے اللہ اس کو پورا کر دے گا، بابر کی محنت پوری ہے لیکن اگر اللہ کی طرف سے دیر ہے تو کوئی بات نہیں۔

صحافی نے کپتان کے والد سے اگلا سوال کیا آپ کی کیا خواہش ہے کہ بابر اعظم ایشیا کپ اٹھائے؟ جس پر اعظم صدیقی نے فوراًصحافی کو ٹوکتے ہوئے کہا کہ غلط بات نہ کریں بابر اعظم نہیں بلکہ یہ کہیں کہ پاکستان ایشیا کپ اٹھائے، بابر اعظم پاکستان ہے، اسی طرح آخر تک سارےکھلاڑی  ماریں گے کیوں کہ سب بابر ہیں۔

رضوان کے  ٹی ٹوئنٹی رینکنگ میں بابر کی جگہ لینے کےسوال پر اعظم صدیقی کا کہنا تھا کہ میرے لیے رضوان بھی بابر ہے کیوں کہ سب پاکستان کے لیے کھیل رہے ہیں۔

یاد رہے کہ بابر اعظم سے ٹی ٹوئنٹی رینکنگ کی پہلی پوزیشن چھن گئی ہے، پلیئرز رینکنگ کے مطابق قومی وکٹ کیپر بیٹر محمد رضوان نمبر ون ٹی ٹوئنٹی بیٹر بن گئے ہیں۔