14 ستمبر ، 2022 
انگلینڈ کیخلاف سیریز اور ٹی 20 ورلڈکپ کیلئے ٹیم کا انتخاب سلیکٹرز کیلئے کڑا امتحان
14 ستمبر ، 2022
انگلینڈ کے خلاف ہوم سیریز اور ٹی ٹوئنٹی ورلڈ کپ کے قومی اسکواڈ کا انتخاب سلیکشن کمیٹی کے لیے کڑا امتحان بن گیا ہے۔
ذرائع کا بتانا ہے کہ ٹیم کے لیے سلیکشن کمیٹی کی مشاورت کا عمل جاری ہے مگر ناموں کو حتمی شکل دینے میں شدید مشکلات کا سامنا ہے جس کی اصل وجہ ایشیا کپ میں بیٹرز کی خراب پرفارمنس اور چند کھلاڑیوں کے فٹنس مسائل ہیں۔
تجویز ہے کہ محمدرضوان اور شاداب خا ن کو انگلینڈ کے خلاف ابتدائی میچز میں آرام دیا جائے اور سرفراز احمد، محمد زاہد اور عثمان قادر کو کھلایا جائے، اوپنر شان مسعود کو بھی اسکواڈ میں شامل کیے جانے کا امکان ہے۔
خیال رہے کہ ایشیا کپ میں کئی کرکٹرز ان فٹ ہوئے جبکہ ری ہیب کے لیے لندن میں موجود شاہین شاہ آفریدی نے تاحال بولنگ پریکٹس شروع نہیں کی ہے۔
واضح رہے کہ انگلینڈ کے خلاف ہوم سیریز 20 ستمبر سے شروع ہو گی جبکہ ٹی ٹوئنٹی ورلڈ کپ کے لیے اسکواڈ کے اعلان کی کٹ آف ڈیٹ 15 ستمبر ہے، اگر ٹیم کوحتمی شکل نہ دی جا سکی تو ورلڈ کپ کی کٹ آف ڈیٹ میں توسیع کے لیے آئی سی سی سی سے درخواست کی جائے گی۔
اس حوالے سے ذرائع کا یہ بھی بتانا ہے کہ ٹی ٹوئنٹی ورلڈکپ کے لیے قومی ٹیم کے ناموں کا اعلان کل تک متوقع ہے۔
مزید خبریں :
