بات عمران خان کی نااہلی پر رُکے گی نہیں: شاہد خاقان عباسی

پاکستان مسلم لیگ ن کے سینیئر رہنما اور سابق وزیر اعظم شاہد خاقان عباسی نے کہا ہے کہ بات عمران خان کی نااہلی پر رُکے گی نہیں، عمران خان کو ابھی یہ بتانا ہے کہ تحائف خریدنے کے لیے پیسے آئے کہاں سے؟

جیو نیوز کے پروگرام ’’آج شاہزیب خانزادہ کے ساتھ‘‘ میں بات چیت کرتے ہوئے شاہد خاقان نے کہا کہ جو پیسے آئے تھے وہ اس نے کہاں چھپائے، کیا ان پیسوں پر عمران خان نے ٹیکس دیا؟

الیکشن کمیشن نے توشہ خانہ کیس میں عمران خان کو نااہل قرار دیدیا

عمران خان کرپٹ پریکٹس میں ملوث رہے اور ان کی جانب سے جمع کرایا گیا جواب درست نہیں تھا، الیکشن کمیشن نے چیئرمین پی ٹی آئی عمران خان کو آئین کے آرٹیکل 63 اے کے تحت نااہل قرار دیاہے۔

انہوں نے کہا کہ اب امتحان سپریم کورٹ کا بھی ہو گا، اسی سپریم کورٹ نے ایک وزیراعظم کو اس سے بہت کم بات پر ڈی سیٹ کیا تھا۔

شاہد خاقان عباسی کا کہنا تھا کہ نواز شریف نے بطور نجی شہری اپنے بیٹے کی کمپنی سے فیس لینی تھی، جو انھوں نے نہیں لی، اس لیے اسے ظاہر بھی نہیں کیا،  اس جرم میں نواز شریف کو تاحیات نااہل قرار دیا گیا، انھیں اپیل کا حق بھی نہیں دیا گیا،

شاہد خاقان عباسی کا کہنا تھا کہ اب سپریم کورٹ ہی بتا سکے گی کہ کیا نواز شریف کے لیے نظامِ انصاف دوسرا ہے؟