07 نومبر ، 2022 
پاکستان
خط میں واقعے کی ابتدائی رپورٹ، واقعے کے وقت ٹریننگ کیمپ میں موجود انسٹرکٹرز، ٹرینرز کے نام، قومیت اور رابطے کی تفصیلات طلب کی گئی ہے — فوٹو: فائل
ارشد شریف قتل کیس: پاکستان نے کینیا سے اہم معلومات طلب کرلیں
07 نومبر ، 2022
پاکستان نے ارشد شریف قتل کیس میں کینیا سے اہم معلومات طلب کرلیں ہیں۔
پاکستان کی تحقیقاتی ٹیم کی جانب سے کینیا پولیس کو لکھےگئے خط میں واقعے کی ابتدائی رپورٹ، واقعے کے وقت ٹریننگ کیمپ میں موجود انسٹرکٹرز، ٹرینرز کے نام، قومیت اور رابطے کی تفصیلات طلب کی گئی ہے۔
تحقیقاتی ٹیم کی جانب سے وقار احمد ان کے اہلیہ اور خرم احمد کی کالز کی تفصیلات بھی طلب کی گئی ہیں۔
پاکستانی ٹیم کی جانب سے کینیا کو لکھے گئے خط میں فائرنگ میں ملوث پولیس افسران کے نام، ان کی کال ڈیٹا، ابتدائی بیانات بھی مانگے گئے ہیں۔
تحقیقاتی ٹیم کی جانب سے لکھے گئے خط میں فائرنگ کی جگہ کی ’’جیو فینسنگ‘‘ رپورٹ اور عینی شاہدین کی کالز تفصیلات کی فراہمی کی بھی درخواست کی گئی ہے۔
