08 نومبر ، 2022 
ندا ڈار نے آئی سی سی پلیئر آف دی منتھ کا ایوارڈ والد کے نام کردیا
08 نومبر ، 2022
پاکستان ویمن کرکٹ ٹیم کی آل راؤنڈر ندا ڈار کو اکتوبر کے مہینے میں شاندار پرفارمنس کا مظاہرہ کرنے پر آئی سی سی ویمن پلیئر آف دی منتھ قرار دیا گیا ہے ۔ ان کے مدمقابل دو بھارتی کرکٹرز تھیں۔
آل راؤنڈر ندا ڈار نے جیو نیوز سے خصوصی گفتگو کرتے ہو ئے کہا کہ میں پلیئر آف دی منتھ کے ایوارڈ کو اپنے والد کے نام کروں گی ۔ میرے والد میرے لیے بہت دعائیں کیا کرتے تھے۔ آج میں جو کچھ بھی ہوں اور جس مقام پر ہوں اپنے والد کی وجہ سے ہوں۔
ندا ڈار نے کہا کہ کھلاڑی کی حیثیت سے پرفارم کرنے کی ضرورت ہوتی ہے ، اچھی کارکردگی کے تسلسل کو برقرار رکھنے کی ضرورت ہے ، دورہ آسٹریلیا کے بعد ورلڈ کپ جیسا اہم ایونٹ ہے ، بحیثیت ٹیم ہمیں اچھی کارکردگی کا مظاہرہ کرنا ہے۔
آل راؤنڈر نے کہا کہ ایسے اعزازات ملنے سے اعتماد میں اضافہ ہوتا ہے ، دوسری کھلاڑی بھی متاثر ہو کر اچھا کرنے کی کوشش کرتی ہیں ، نداڈار نے کہا کہ آئر لینڈ کے خلاف ہماری ٹاپ آرڈر بیٹرز اچھا کھیل رہی ہیں ، میں بھی منتظر ہوں کہ بیٹنگ آئے لیکن مجھے لگتا ہے کہ ٹی ٹوئنٹی سیریز میں تمام کھلاڑیوں کو اپنی صلاحیتیں دکھانے کا موقع ملے گا ۔
نداڈار نے ایک بار پھر اپنے عزم کا اظہار کیا کہ مجھے پاکستان کی نمبر ون اور دنیا کی بہترین آل راؤنڈر بننا ہے ۔ میری کوشش ہے کہ ٹیم کو زیادہ سے زیادہ میچز جتواؤں۔
مزید خبریں :
کراچی کے ہوٹل میں آگ لگنے کے باعث ویمنز نیشنل ون ڈے کپ ملتوی
18 نومبر ، 2024
