' اب تک حیران ہوں پاکستان یہ کیسے کرلیتا ہے! ' سابق ویسٹ انڈین کرکٹر

اگر مگر کا شکار پاکستان کرکٹ ٹیم کے آئی سی سی ٹی ٹوئنٹی ورلڈکپ کے فائنل میں پہنچنے پر سابق ویسٹ انڈین کرکٹر این بشپ بھی حیران ہوگئے۔

بدھ کو  ٹی ٹوئنٹی ورلڈ کپ کے پہلے سیمی فائنل میں شاہینوں نے کیویز کو شکست دیکر فائنل کے لیے کوالیفائی کر لیا۔

آسٹریلیا میں جاری آئی سی سی مینز ٹی ٹوئنٹی ورلڈکپ میں اپنے ابتدائی دو میچز بھارت اور زمبابوے سے ہارنے کے بعد پاکستان ٹیم کا سیمی فائنل میں پہنچنا کافی مشکل دکھائی دے رہا تھا، اپنی کارکردگی کے ساتھ گرین شرٹس کو دوسری ٹیموں پر انحصار کرنا پڑا اور فائنل فور میں جگہ بنانے کے لیے اگر مگر کی صورتحال تھی۔

معاملہ کچھ یوں ہوگیا تھا کہ اتوار کو سپر 12 مرحلے کےآخری 3 میچز سے گروپ 2 میں شامل پاکستان،بنگلادیش ، جنوبی افریقا اور بھارت کے سیمی فائنل میں پہنچے کا فیصلہ ہونا تھا، اگر گرین شرٹس کے لحاظ سے دیکھا جائے تو اس کے لیے ضروری تھا کہ وہ اپنا آخری میچ بنگلادیش سے جیتےاور پھر نیدرلینڈز یا تو جنوبی افریقا کو اپ سیٹ شکست دے یا پھر بھارت کو زمبابوے کے ہاتھوں شکست ہو۔

تاہم ہوا یوں کہ اتوار کو پہلے میچ میں نیدرلینڈز نے جنوبی افریقا کو 13 رنز سے شکست دے کر اسے ٹورنامنٹ سے باہر کیا جبکہ بھارت سیمی فائنل کے لیے کوالیفائی کرگیا جس کے بعد بنگلادیش اور پاکستان کا دن کا دوسرا میچ کوارٹر فائنل کی صورت اختیار کرگیا۔

قبل ازیں پاکستان نے بنگلادیش کو 5 وکٹوں سے شکست دے کر پہلے سیمی فائنل اور پھر بدھ کو نیوزی لینڈ کو شکست دینے کے بعد فائنل کیلئےکوالیفائی کرلیا۔

شاہینوں نے کیویز کو دبوچ کر ٹی ٹوئنٹی ورلڈکپ کے فائنل کیلئے کوالیفائی کر لیا

پاکستان نے 1992 کے ورلڈکپ کے سیمی فائنل میں بھی نیوزی لینڈ کو شکست دیکر فائنل تک رسائی حاصل کی تھی

ورلڈکپ کے فائنل میں پہنچنے پر جہاں پاکستان نے سب کو حیران کیا وہیں سابق ویسٹ انڈین کرکٹر این بشپ بھی ابھی تک یقین نہیں کرپارہے کہ پاکستانی ٹیم فائنل میں کیسے پہنچ گئی؟

پہلے سیمی فائنل کے بعد سوشل میڈیا پر بیان جاری کرتے ہوئے بشپ نے کہا کہ 'یہاں سڈنی میں رات کے 2 بج رہے ہیں اور اب تک حیران ہوں کہ پاکستان یہ کیسے کرلیتا ہے'۔

واضح رہے کہ دوسرا سیمی فائنل کل بھارت اور انگلینڈ کے درمیان کھیلا جائے گا، جبکہ ایونٹ کا فائنل اتوار کو میلبرن میں ہوگا۔