حکومت نے شوگر ملز مالکان کے آگے گھٹنے ٹیک دیے، چینی کی قیمت بڑھنے کا امکان
20 نومبر ، 2022
حکومت نے شوگر ملز مالکان کے آگے گھٹنے ٹیکتے ہوئے شوگر ملز مالکان کو بروقت کرشنگ کی ہدایت کرنے اور تیار چینی مقامی مارکیٹ میں فروخت کرنے کی ہدایت دینے کے بجائے چینی برآمد کرنے کا فیصلہ کر لیا۔
ذرائع کے مطابق وزارت پیداوار اور شوگر ملز مالکان کے درمیان چینی کی برآمد سے متعلق معاملات طے پا گئے ہیں۔
شوگر ملز ایسوسی ایشن کے ذرائع کا کہنا ہے کہ پہلے مرحلے میں حکومت 5 لاکھ ٹن چینی برآمد کرنے کی اجازت دینے پر آمادہ ہو گئی ہے، شوگر ملز مقامی چینی کی قیمت میں فوری اضافہ نہیں کریں گی تاہم نیا اسٹاک آنے پر چینی کی قیمت بڑھ سکتی ہے۔
ذرائع کا بتانا ہے کہ گنےکی کرشنگ بھی اسی ماہ شروع کر دی جائے گی، سرپلس چینی کی برآمد سے ملک کو ایک ارب ڈالر زرمبادلہ ملے گا اور شوگر ملز مالکان اسی ہفتے وزیراعظم شہباز شریف سے ملاقات کریں گے۔
ذرائع کا کہنا ہے کہ چینی اگر مقامی مارکیٹ میں فروخت کی جاتی تو عوام کو چینی سستے داموں مل سکتی تھی۔
