’یہ سب بابر کی سنچری دیکھنے آئے ہیں‘، ناصر حسین نے تماشائیوں کے جوش کی ویڈیو شیئر کردی

انگلینڈ کے سابق کپتان ناصر حسین نے قومی ٹیم کے کپتان بابر اعظم کی راولپنڈی ٹیسٹ کے تیسرے روز سنچری کے وقت اسٹیڈیم میں موجود تماشائیوں کے جوش و خروش کی ویڈیو شیئر کی ہے۔

پاکستان اور انگلینڈ کے درمیان پنڈی ٹیسٹ کے تیسرے روز قومی ٹیم کے کپتان بابر اعظم نے اپنے ٹیسٹ کیرئیر کی آٹھویں سنچری 126 گیندوں پر ایک چھکے اور 13 چوکوں کی مدد سے مکمل کی۔

سابق ٹیسٹ کرکٹر ناصر حسین بابر اعظم کی بیٹنگ کے معترف ہیں اور چند روز قبل انہوں نے بابر اعظم کا انٹرویو بھی کیا تھا۔

پنڈی ٹیسٹ میں رنز کا انبار، عبداللہ اور امام کے بعد بابر کی بھی سنچری

اما م الحق 121 اور عبد اللہ شفیق 114 رنز بنا کر آؤٹ ہوئے

اب اسکائے اسپورٹس کی جانب سے ناصر حسین کی ایک ویڈیو شیئر کی گئی ہے جس میں انہیں پنڈی اسٹیڈیم میں بابر اعظم کی سنچری کے وقت تماشائیوں کا جوش و خروش دکھاتے دیکھا جا سکتا ہے۔

ناصر حسین تماشائیوں کے نعرے دکھانے کے ساتھ کہہ رہے ہیں کہ کیا زبر دست لمحات ہیں، بابر اعظم کی جانب سے ’سچرڈے سنچری‘، پہلے دو روز تماشائیوں کی تعداد کم رہی لیکن آج یہ لوگ صرف ایک وجہ سے آئے ہیں، یہ سب بابر اعظم کو سنچری کرتا دیکھنے کے لیے آئے اور اس بندے نے میدان میں کر دکھایا۔