05 دسمبر ، 2022 
ایم کیو ایم پاکستان کا ایڈمنسٹریٹر صرف چند دنوں کیلئے آئے گا: سعید غنی
05 دسمبر ، 2022
سندھ کے لیبر منسٹر سعید غنی کا کہنا ہے کہ ایم کیو ایم پاکستان کا کراچی میں ایڈمنسٹریٹر صرف چند دنوں کیلئے آئے گا، پندرہ جنوری کو بلدیاتی انتخابات کے بعد میئر کراچی ہی شہر کا نظام چلائے گا۔
صوبائی وزیر سعید غنی نے کہا کہ کوئی شک نہیں کہ مرتضیٰ وہاب نے بہت کام کیا لیکن اگلا ایڈمنسٹریٹر ایم کیو ایم سے مشاورت کے بعد ہی تعینات کیا جائے گا، ایم کیو ایم سے معاہدہ کوئی مک مکا نہیں۔
انہوں نے کہا کہ بلدیاتی ایکٹ میں ترامیم کے بعد میئر بااختیار ہوگا۔
دوسری جانب ایڈمنسٹریٹر کراچی اور ترجمان سندھ حکومت مرتضیٰ وہاب کا کہنا ہے کہ جماعت اسلامی اور ایم کیو ایم کو ان پر اعتراض ہے، ایڈمنسٹریٹر کا عہدہ جس کے پاس بھی ہوگا اس پر اعتراض کیا جاتا رہے گا، جب تک سندھ حکومت کہے گی کام کرنے کو تیار ہوں۔
