10 جنوری ، 2023 
شہزادہ ہیری کی متنازع سوانح حیات فروخت کے لیے پیش
10 جنوری ، 2023
شہزادہ ہیری کی سوانح حیات کچھ تاخیر کے بعد باضابطہ طور پر فروخت کے لیے پیش کردی گئی ہے۔
برطانیہ بھر میں شہزادہ ہیری کی سوانح حیات اسپیئر 10 جنوری کی شب 12 بجے فروخت کے لیے پیش کی گئی جسے خریدنے کے لیے دکانوں کے آگے لوگوں کی لمبی قطاریں موجود تھیں۔
برطانوی شہزادے کی متنازع سوانح حیات کی نقول لیک ہونے کے بعد متعدد انکشافات سامنے آئے تھے جس کی وجہ سے لوگوں میں کتاب کے بارے میں اشتیاق بڑھ گیا تھا۔
یہ کتاب دنیا بھر میں 16 زبانوں میں شائع کی جائے گی جس میں شہزادہ ہیری نے شاہی خاندان کے بارے میں حیران کن انکشافات کیے ہیں۔
یہ کتاب آن لائن پہلے ہی بیسٹ سیلر قرار دی جاچکی ہے۔
410 صفحات کی کتاب میں شہزادہ ہیری نے شاہی خاندان کے اندر موجود تنازعات اور تناؤ کے بارے میں بتایا جبکہ اور بھی متعدد انکشافات کیے ہیں۔
کتاب میں ایک جگہ شہزادہ ہیری نے دعویٰ کیا کہ 2019 میں ان کے بڑے بھائی شہزادہ ولیم نے ان پر حملہ کرکے فرش پر گرا دیا تھا۔
ایک اور جگہ انہوں نے لکھا کہ جس وقت ان کی والدہ شہزادی ڈیانا کا انتقال ہوا تو وہ یہ سمجھے تھے کہ انہوں نے مشکلات سے تنگ آکر موت کا ڈرامہ کیا ہے۔
ایک اور جگہ شہزادہ ہیری کا کہنا تھا کہ انہیں ملکہ الزبتھ کے انتقال کا علم خاندان کی بجائے بی بی سی ویب سائٹ سے ہوا۔
اس کتاب کے بارے میں بکنگھم پیلس کی جانب سے اب تک کوئی ردعمل جاری نہیں کیا گیا۔
