16 جنوری ، 2023 
ناصر محمود کھوسہ نے نگراں وزیراعلیٰ پنجاب کا عہدہ قبول کرنے سے معذرت کرلی
16 جنوری ، 2023
عمران خان اور چوہدری پرویز الٰہی کے نگراں وزیراعلیٰ پنجاب کے لیے نامزد کردہ تین ناموں میں سے ایک ناصر محمود کھوسہ نے عہدہ قبول کرنے سے معذرت کر لی۔
مسلم لیگ ن کے رہنما خواجہ آصف نے کہا کہ ناصر کھوسہ صاحب کی قابلیت، اصول پسندی اور دیانتداری مسلمہ ہے، بحیثیت بیوروکریٹ ان کا کردار قابل فخر ہے۔
خواجہ آصف نے کہا کہ ہم نے ناصر محمود کھوسہ سے رابطہ کیا کہ فریقین کی طرف سے متفقہ کیئر ٹیکر وزیراعلیٰ کا عہدہ قبول کریں لیکن انہوں نے تجویز سے اتفاق نہیں کیا۔
ناصر محمود کھوسہ نے اس حوالے سے ایک بیان میں کہا کہ نگراں وزیراعلیٰ کے لیے جن لوگوں نے مجھ پر اعتماد کیا ان کا شکریہ، میں نے نگراں وزیراعلیٰ کا عہدہ سنبھالنے سے معذرت کی ہے۔
یاد رہے کہ گزشتہ روز وزیراعلیٰ پنجاب چوہدری پرویز الٰہی نے نگراں وزیراعلیٰ کے لیے 3 نام تجویز کیے تھے جن میں ناصر محمود کھوسہ، احمد نواز سکھیرا اور نصیر احمد خان شامل تھے۔
دوسری جانب نگراں وزیراعلیٰ کے ناموں پر اتفاق رائے کے لیے پنجاب اسمبلی میں اپوزیشن لیڈر شہباز شریف کے مقرر کردہ نمائندے ملک احمد خان نے بھی پرویز الٰہی سے رابطہ کر کے نگراں سیٹ اپ کے لیے ناموں پر مشاورت کی۔
