29 جنوری ، 2023 
مفتاح کے پیٹرول کی قیمت بڑھانے پر ناراض لیگی قیادت اسحاق ڈارکے 35 روپے بڑھانے پرخاموش
29 جنوری ، 2023
وزیر خزانہ اسحاق ڈار نے پیٹرول اور ڈیزل کی قیمت میں 35 روپے کے بڑے اضافے کا اعلان کیا ہے جس پر مسلم لیگ ن کی قیادت کی جانب سے فوری ردعمل سےگریز کیا جا رہا ہے۔
یاد رہےکہ گزشتہ سال 16 اگست کو حکومت نے پیٹرول کی قیمت میں 6 روپے 72 پیسے کا اضافہ کیا تھا تو لیگی قیادت نے سخت ردِعمل دیا تھا، اس وقت وفاقی وزیر خزانہ مفتاح اسماعیل تھے۔
پیٹرول کی قیمت میں اضافے پر رہنما ن لیگ مریم نواز نے بتایا تھا کہ نواز شریف نے نہ صرف پیٹرول مہنگا کرنے کی مخالفت کی ہے بلکہ یہاں تک کہا ہےکہ عوام پر مزید ایک پیسےکا بوجھ قبول نہیں۔
مریم نواز کا کہنا تھا کہ نواز شریف یہ کہہ کر میٹنگ سے اٹھ کر چلے گئےکہ حکومت کی مجبوری ہے تو وہ اس فیصلے میں شامل نہیں۔
آج وزیر خزانہ اسحاق ڈار نے پیٹرول اور ڈیزل کی قیمت میں 35 روپےکے بڑے اضافےکا اعلان کیا ہے تو لیگی قیادت کی جانب سے کوئی ردعمل سامنے نہیں آیا۔
