ترکیہ: ’سب کچھ ہمارے اوپر ہے‘، ملبے میں پھنسی خاتون کی ویڈیو وائرل
07 فروری ، 2023
ترکیہ میں گزشتہ روز آنے والے زلزلے کو 24 گھنٹوں سے زائد کا وقت کا گزرچکا ہے لیکن اس کے نتیجے میں زمین بوس ہونے والی عمارتوں کے ملبے تلے اب بھی متعدد افراد دبے ہوئے ہیں جن کی ویڈیوز بھی سوشل میڈیا پر وائرل ہیں۔
الجزیرہ کے سوشل میڈیا پیج سے سامنے والی ملبے میں پھنسی زندہ خاتون کی ویڈیو اس وقت سوشل میڈیا پر وائرل ہے جنہوں نے ملبے میں دبے ہونے کے باوجود اپنی جان بچانے کی غرض سے ویڈیو بناکر اپنی بہن کو بھیجی تھی۔
ملبے میں پھنسی خاتون نے ویڈیو میں مدد کے لیے پکارتے ہوئے کہا کہ ’بہن ہم بہت مشکل صورتحال میں ہیں، ہمارے اوپر چھت دیکھو، پائپ لائنیں ہمارے اوپر ہیں، سب کچھ ہمارے اوپر ہے‘۔
دوسری جانب ایک لاچار باپ کی ویڈیو بھی شیئر کی گئی ہے جس میں ملبے میں پھنسے ایک بچے کا باپ اپنے بیٹے کو ہاتھ واضح کرنے کا کہتے سنا جاسکتا ہے۔
ویڈیو میں بچے کا باپ ملبے سے باہر کھڑے کہتے سنا جاسکتا ہے کہ ’ہاتھ دکھاؤ ہم تمہیں بچالیں گے، تم ٹھیک ہو نا ہم تمہیں بچالیں گے‘ ۔
جس کے بعد ویڈیو میں بچے کا ہاتھ واضح ہوتا بھی دیکھا جاسکتا ہے۔
