10 فروری ، 2023 
پی ایس ایل8: پچھلے سیزن کی شکست کو بھول کر نیا سیزن اچھا کھیلیں گے، شرجیل خان
10 فروری ، 2023
پاکستان سپر لیگ( پی ایس ایل) کی ٹیم کراچی کنگز کے اوپننگ بیٹر شرجیل خان کا کہنا ہے کہ کراچی کنگز کے کیمپ کا اچھا آغاز ہوا ہے، ذاتی طور پر پہلے سے ہی اس ایونٹ کی تیاری کر رہا تھا۔
جیو نیوز سے خصوصی گفتگو کرتے ہوئے شرجیل خان نے کہا کہ پہلے سے ذہن بنایا تھا کہ مجھے اس لیگ کیلئے کس طرح تیاری کرنی ہے،پاکستان کپ کے بعد کافی ٹائم ملا تھا جس میں پی ایس ایل کی تیاری کی۔
شرجیل خان کا کہنا تھا کہ جس ٹیم سے کھیلوں، کوشش ہوتی ہے ٹیم کو اچھا اسٹارٹ دوں، میچ جتواؤں، بطور اوپنر جارح مزاجی ہی میرا انداز ہے۔
انہوں نے کہا کہ کوشش ہوتی ہے کہ اچھے اسٹارٹ کے بعد لمبا اسکور کروں، کراچی کنگز میں سپورٹ ملتی ہے، ماحول انجوائے کر رہا ہوں، ٹی ٹوئنٹی میں ہر سیزن ایک جیسا نہیں ہوتا، پچھلے سیزن کی شکست کو بھول کر نیا سیزن اچھا کھیلیں گے۔
شرجیل نے کہا کہ میں فینز سے کہوں گا کہ کراچی کنگز کو ہمیشہ کی طرح سپورٹ کریں۔
واضح رہے کہ پاکستان سپر لیگ کا آٹھواں سیزن 13 فروری سے شروع ہورہا ہے، ایونٹ کے لیے ٹیموں نے تیاریاں شروع کردی ہیں۔
