10 فروری ، 2023 
سال 2023 میں بابر اعظم کا سب سے بڑا ہدف کیا ہے؟
10 فروری ، 2023
پاکستان کے اسٹار بیٹر اور انٹرنیشنل کرکٹ کونسل (آئی سی سی) کے ون ڈے کرکٹ کے 2 مرتبہ پلیئر آف دی ایئربابر اعظم نے 2023 کیلئے اپنے سب بڑے گول کے حصول پر نظریں جما لی ہیں۔
ون ڈے کرکٹ میں گذشتہ 24 ماہ کے دوران بابر اعظم ہر ممکنہ چیز اپنے نام کر چکے ہیں، لیکن ایک چیز باقی ہے جسے وہ اب تک حاصل نہیں کر پائے اور اب انہوں نے اس اعزاز کے حصول پر نظریں جما لی ہیں۔
اپنے ایک تازہ انٹرویو میں آئی سی سی ڈیجیٹل انسائیڈر کی زینب عباس سے بات کرتے ہوئے بابر اعظم نے بتایا کہ خواہش ہے کہ عمران خان کی طرح قومی ٹیم کی قیادت کرتے ہوئے پاکستان کو دوسری مرتبہ ورلڈ کپ چیمپیئن کے مقام تک پہنچاؤں۔
انہوں نے کہا کہ شدید خواہش ہے کہ ملک اور قوم کیلئے بھارت میں ہونے والا ورلڈ کپ جیت کر لائیں، آپ کو کئی انفرادی چیزیں بھی نظر آئیں گی لیکن میرا گول صرف ایک ہے کہ ہم ورلڈ کپ جیت کر آئیں۔
انہوں نے کہا کہ رواں برس ورلڈ کپ کی تیاری کیلئے ہمیں کافی ون ڈے کرکٹ کھیلنے کو ملے گی، مقاصد کے حصول اور منزل پر پہنچنے کیلئے قدم بہ قدم آگے بڑھنے کی ضرورت ہوتی ہے ، آپ ایک دم جست لگا کر اپنے مقصد یا منزل تک نہیں پہنچ سکتے۔
بابر اعظم کا کہنا تھا کہ مائنڈسیٹ تو قدم بہ قدم آگے بڑھنے کا ہے لیکن اس کیلئے بھی ذہن میں یہ بات بٹھانا ضروری ہے کہ ہمیں سخت محنت اور بہترین پلاننگ کے ساتھ بہترین پرفارمنس کا مظاہرہ کرنا ہوگا۔
