مسک نے پرانے ویریفائیڈ لوگوں کو کرپٹ قرار دیدیا، بلیو ٹک جلد ختم کرنے کا بھی عندیہ

11 فروری ، 2023

پہلے بلیو ٹک صرف مشہور شخصیات اور سیاستدانوں کو فراہم کیا جاتا تھا لیکن آج ہر ٹام، ڈک اور ہیری بلیو ٹک حاصل کر سکتا ہے: ٹوئٹر صارف۔ فوٹو فائل

دنیا کی معروف مائیکرو بلاگنگ ویب سائٹ ٹوئٹر کے بانی ایلون مسک نے پرانے ویریفائیڈ صارفین کو کرپٹ قرار دیتے ہوئے بلیو ٹک کو جلد ختم کرنے کا اشارہ دیدیا۔

ایلون مسک نے جب سے ٹوئٹر کا چارج سنبھالا ہے تو اس وقت سے آئے روز مائیکرو بلاگنگ ویب سائٹ پر کچھ نہ کچھ تبدیلیاں دیکھنے کو مل رہی ہیں۔

حال ہی میں ٹوئٹر کی جانب سے کچھ امریکن صارفین کے لیے ایک ٹوئٹ میں حروف 280 سے بڑھا کر 4000 تک کی گئی ہے جبکہ ٹوئٹر میں پیمنٹ سروس متعارف کرانے کے منصوبے پر بھی کام شروع ہو چکا ہے۔

یہ بھی پڑھیں

اس کے علاوہ ٹوئٹر کے بلیو ٹک کے حوالے سے بھی متعدد تبدیلیوں کی خبریں زیر گردش ہیں اور اسی حوالے سے ایلون مسک نے ایک خاتون صارف کے سوال کا جواب بھی دیا ہے۔

ٹوئٹر پر ایک خاتون صارف نے ایلون مسک کو مخاطب کرتے ہوئے کہا کہ بلیو ٹک اب ایک مذاق بنتا جا رہا ہے، پہلے بلیو ٹک صرف مشہور شخصیات اور سیاستدانوں کو فراہم کیا جاتا تھا لیکن آج ہر ٹام، ڈک اور ہیری بلیو ٹک حاصل کر سکتا ہے، ٹوئٹر کے ویری فکیشن ٹک نے اپنی افادیت کھو دی ہے۔

ٹوئٹر صارف کو جواب دیتے ہوئے ایلون مسک نے لکھا لیگیسی بلیو ٹک کے نشان جلد ہی ختم کر دیے جائیں گے، یہ وہ ہیں جو حقیقی طور پر کرپٹ ہیں۔

ٹوئٹر کے وہ صارفین جن کے اکاؤنٹس ایلون مسک کا چارج سنبھالنے سے پہلے والے سسٹم کے تحت ویریفائی ہوئے تھے انہیں ’لیگیسی ویریفائیڈ‘ اکاؤنٹس کہا جاتا ہے۔

ایلون مسک کے جواب پر ایک اور صارف نے پوچھا کہ آپ کیسے پتہ لگائیں گے کہ کون کرپٹ ہے۔

ریا نامی ٹوئٹر صارف نے لکھا کہ ایلون مسک کے کہنے کا مطلب ہے کہ جن مشہور شخصیات نے اپنی زندگی میں بہت کچھ حاصل کیا وہ کرپٹ ہیں، جو انتہائی مضحکہ خیز ہے۔