کھیل

کوئٹہ گلیڈی ایٹرز نے جو مجھ پر بھروسہ کیا اس پر پورا اترنے کی کوشش کروں گا،عمر اکمل

13 فروری ، 2023

پاکستان سپر لیگ کی ٹیم کوئٹہ گلیڈی ایٹرز میں شامل مڈل آرڈر بیٹر عمر اکمل کا کہنا ہے کہ کوئٹہ کی ٹیم نے جو ان پر بھروسہ کیا ہے وہ اس پر پورا اترنے کی ہرممکن کوشش کریں گے۔

کراچی میں میڈیا سے گفتگو میں عمر اکمل نے کہا کہ وہ اس ٹورنامنٹ میں سنچریاں کریں یا نہ کریں، اگر ان کی ٹیم جیتے گی تو انہیں زیادہ خوشی ہوگی، کوشش ہوگی کہ ایسی پرفارمنس دیں جس سے ٹیم کی جیت ممکن ہوسکے۔

ان کا کہنا تھا کہ گلیڈی ایٹرز کیلئے پچھلا سیزن اتنا اچھا نہیں گزرا تھا لیکن اس بار جیسی ٹیم بنی ہے اور جو کامبینیشن بنا ہے، اس کو دیکھ کر ایونٹ کافی اچھا لگ رہا ، اُمید ہے اچھے رزلٹ دیں گے۔

انہوں نے کہا کہ یہ بات ان کیلئے حوصلہ افزا ہے کہ کوئٹہ گلیڈی ایٹرز نے ان پر اعتماد کیا، پچھلے سال بھی انہیں جب موقع ملا تھا اس کے بعد کی کارکردگی سب کے سامنے ہے، ان کا کہنا تھا کہ مجھ پر اس بار بھی بھروسہ کیا ہے کوشش کروں گا کہ اس بھروسے پر پورا اتروں۔

ایک سوال پر عمر اکمل نے کہا کہ پچھلے 23،22 سال سے خود کو ثابت ہی کر رہا ہوں، میری کوشش ہوتی ہے کہ جہاں بھی بیٹنگ آئے ٹیم کیلئے اچھا کردارا دا کروں۔

عمر اکمل کا کہنا تھا کہ کنڈیشن دیکھ کر لگ رہا ہے کہ میچز اچھے ہوں گے ، رات کے میچز میں اوس کا کردار بھی ہوگا، ڈیو کو ذہن میں رکھ کر بولنگ کوچ عمر گل بولرز کو گیلے گیند سے بولنگ کی پریکٹس کرا رہے ہیں۔ امید ہے کہ بولنگ یونٹ کے طور پر ہمیں زیادہ پرابلم نہیں ہوگی۔

انہوں نے کہا کہ پاکستان کا مین بولنگ یونٹ ہی اس ٹورنامنٹ میں ایکشن میں ہے اور وہ تمام ہی نوجوان ہیں، میرے خیال میں ابھی یہ تمام پلیئرز طویل عرصہ تک کھیلیں گے۔

ایک سوال پر انہوں نے کہا کہ اپنی ہٹنگ کو بہتر کرنے کیلئے نیٹس پر کافی محنت کرتا ہوں، کامران اکمل مجھے کافی محنت کراتے ہیں، اپنے بیٹنگ آرڈر کو ذہن میں رکھ کر کوشش کرتا ہوں کہ تیاریاں کروں۔

انہوں نے کہا کہ جب میڈیا نہیں چھوڑتا تو بری پرفارمنس پر بڑے بھائی کیوں نہیں ڈانٹیں گے ، انہوں نے کہا کہ کامران اکمل پریکٹس کراتے ہیں، ان کی نگرانی میں کرکٹ کی ڈیمانڈ کے مطابق پریکٹس کرنے کی کوشش کرتا ہوں۔