14 فروری ، 2023 
شہباز گل کی بریت مسترد ہونے کے فیصلے کیخلاف اپیل کل سماعت کیلئے مقرر
14 فروری ، 2023
اسلام آبادہائیکورٹ میں اداروں کوبغاوت پر اکسانے کے کیس میں پاکستان تحریک انصاف کے رہنما شہباز گل کی بریت مسترد ہونے کے فیصلے کے خلاف اپیل کل سماعت کیلئے مقرر کردی گئی۔
شہبازگل نے سیشن عدالت سے بریت مسترد ہونے کا فیصلہ ہائیکورٹ میں چیلنج کیا تھا۔
درخواست میں استدعا کی گئی تھی کہ درخواست پر فیصلے تک ٹرائل کورٹ میں کارروائی روکی جائے۔ درخواست میں وفاق کو فریق بنایا گیا ہے۔ اسلام آباد ہائیکورٹ نے ایڈیشنل سیشن جج کے فیصلے کے خلاف اپیل کل سماعت کیلئے مقرر کردی ہے۔
خیال رہےکہ ڈسٹرکٹ اینڈ سیشن کورٹ اسلام آباد نے 11 فروری کو پی ٹی آئی رہنما شہباز گل کی بریت کی درخواست مسترد کردی تھی۔
اسلام آباد کے ایڈیشنل سیشن جج طاہر عباس سپرا نے شہباز گل کی درخواست مسترد کرتے ہوئے ان پر فرد جرم عائد کرنے کا فیصلہ کیا تھا، عدالت نے کہا تھا کہ شہباز گل پر فرد جرم 27 فروری کو عائد کی جائےگی۔
یاد رہے کہ شہباز گل پر اداروں کے سربراہان کے خلاف اکسانے کے متعدد مقدمات درج ہیں اور وہ ضمانت پر رہا ہیں۔
