18 فروری ، 2023
ڈسٹرکٹ اینڈ سیشن کورٹ اسلام آباد نے آصف علی زرداری پر عمران خان کے قتل کی سازش کے الزام کےکیس میں شیخ رشید پر فرد جرم عائد کرنے کے لیے 2 مارچ کی تاریخ مقرر کردی۔
شیخ رشید کی جانب سے آصف علی زرداری پر عمران خان کے قتل کی سازش کے الزام کےکیس کی سماعت جوڈیشل مجسٹریٹ عمر شبیر نےکی۔
اسلام آباد پولیس نے شیخ رشید کے خلاف کیس کا چالان عدالت میں جمع کرا دیا۔
عدالت نے شیخ رشید پر فرد جرم عائد کرنےکے لیے 2 مارچ کی تاریخ مقرر کرتے ہوئے انہیں 2 مارچ کو عدالت کے سامنے حاضری یقینی بنانےکا حکم دے دیا۔
شیخ رشید نے عدالت سے استدعا کی کہ انہیں ایک کانفرنس میں شریک ہونا ہے ، 15مارچ کی تاریخ دے دیں۔
عدالت نے ریمارکس دیے کہ ہائی کورٹ کے آرڈر ہیں، چالان آگیا ہے اب لمبی تاریخ نہیں دے سکتے، ٹرائل شروع ہوجائے تو پھر دیکھ لیں گے ۔
عدالت نے تھانہ آبپارہ کے ایس ایچ او کے خلاف اندراج مقدمہ کی درخواست واپس کردی، عدالت کا کہنا تھا کہ یہ درخواست سیشن جج کی عدالت میں جمع کرائیں، میرا اختیار نہیں ہے۔