صحت و سائنس

محض ایک رات نہ سونے کا نقصان جان لیں

28 فروری ، 2023

یہ بات ایک نئی تحقیق میں سامنے آئی / فائل فوٹو

کیا آپ کے خیال میں ایک رات نہ سونے سے صحت پر منفی اثرات مرتب نہیں ہوتے؟

تو ایک نئی طبی تحقیق کے نتائج دنگ کر دیں گے۔

درحقیقت محض ایک رات جاگ کر گزارنے سے دماغ کئی سال بوڑھا نظر آنے لگتا ہے۔

جرنل آف نیورو سائنس میں شائع تحقیق میں مشین لرننگ ٹیکنالوجی کو استعمال کرکے نیند کی کمی کے شکار افراد کی دماغی عمر کا تخمینہ لگایا گیا۔

یہ بھی پڑھیں

نتائج سے معلوم ہوا کہ ایک رات کی خراب نیند سے بھی دماغ میں ایسی تبدیلیاں آتی ہیں جو دماغی عمر میں ایک سے 2 سال کی عمر میں اضافے کا عندیہ دیتی ہیں۔

اس تحقیق میں 134 افراد کو شامل کرکے ان کے 4 گروپس بنائے۔

ایک گروپ ایسے افراد کا تھا جو ایک رات مکمل طور پر نیند سے محروم رہے، دوسرا گروپ 3 گھنٹے کم سونے والے افراد کا تھا، تیسرا نیند کی دائمی کمی (ہر رات 5 گھنٹے سونے کے عادی) کے شکار افراد کا تھا جبکہ چوتھا ہر رات 8 گھنٹے تک سونے والوں کا تھا۔

تمام افراد کے 5 راتوں تک ایم آر آئی اسکین کیے گئے تاکہ نیند کی کمی سے پہلے اور بعد کے اثرات کا موازنہ کیا جاسکے۔

نتائج سے معلوم ہوا کہ ایک رات مکمل طور پر نیند سے محروم رہنے والے افراد کی دماغی عمر میں ایک سے 2 سال کا اضافہ ہوگیا۔

البتہ جزوی اور دائمی نیند کی کمی کے شکار گروپس میں شامل افراد کی دماغی عمر میں 8 گھنٹے تک سونے والے افراد کے مقابلے میں کوئی خاص فرق نظر نہیں آیا۔

محققین کا کہنا تھا کہ فی الحال یہ اثرات محض ایک رات کی نیند سے محرومی کے شکار افراد میں نظر آئے تو یہ کہنا مشکل ہے کہ طویل المعیاد بنیادوں پر نیند کی کمی سے دماغی عمر پر کیا اثرات مرتب ہوتے ہیں۔