18 دسمبر ، 2012 
پشاور:انسدادپولیو مہم میں فائرنگ سے زخمی لڑکی چلی بسی
18 دسمبر ، 2012
پشاور …پشاور کے علاقے متھرا میں پولیو مہم کے دوران فائرنگ سے زخمی ہونے والی چودہ سالہ رضاکار لڑکی اسپتال میں زخموں کی تاب نہ لاتے ہوئے دم توڑ گئی۔فائرنگ کا واقعہ تھانہ متھرا کی حدود میں پیش آیا۔ پولیس کے مطابق انسداد پولیو مہم میں حصہ لینے والی رضاکار چودہ سالہ فرزانہ بچوں کو پولیو کے قطرے پلانے کے لئے جا رہی تھی کہ نامعلوم موٹر سائیکل سوار نے اُ س پر فائرنگ کر دی۔ ایک گولی لڑکی کے سر میں لگی جس سے وہ شدید زخمی ہو گئی۔ اور اسے لیڈی ریڈنگ اسپتال منتقل کر دیا گیا ہے جہاں وہ ایک گھنٹہ موت و زیست کی کشمکش میں مبتلا رہنے کے بعد دم توڑ گئی۔ پولیس نے واقعے کی ایف آئی آر درج کر لی ہے۔واقعے کے بعد عالمی ادارہ صحت نے پشاور سمیت صوبے بھر میں پولیو مہم ختم کرنے کی تجویز صوبائی حکومت کو دی۔ تاہم محکمہ صحت کے مطابق انسداد پولیو مہم جاری رکھی جائے گی۔
