کسی کرکٹر کو ایک فارمیٹ کا ہی کھلاڑی سمجھنا ٹھیک نہیں: عبداللہ شفیق

پاکستان سپر لیگ (پی ایس ایل) ٹیم لاہور قلندرز میں شامل ٹاپ آرڈر بیٹر عبداللہ شفیق کا کہنا ہے کہ کسی کرکٹر کو ایک فارمیٹ کا ہی کھلاڑی سمجھنا ٹھیک نہیں، بنیادی کرکٹ ہر فارمیٹ میں ایک ہی ہوتی ہے، اہم بات یہ ہے کہ کون کتنی محنت اور کوشش کر رہا ہے۔

عبداللہ شفیق پی ایس ایل 8 میں بھرپور فارم میں دکھائی دے رہے ہیں، انہوں نے پشاور زلمی کے خلاف 75، اسلام آباد یونائیٹڈ کیخلاف 45 اور ملتان سلطانز کیخلاف 48 رنز کی اننگز کھیلی اور ٹیم کی فتوحات میں اہم کردار ادا کیا۔

پیر کو اسلام آباد کلب میں قلندرز کے پریکٹس سیشن کے دوران جیو کو انٹرویو میں 23 سالہ عبداللہ شفیق نے کہا کہ ٹی ٹوئنٹی میں اسٹرائیک ریٹ کی اہمیت ہوتی ہے اور وہ اپنی بیٹنگ میں اس کو  برقرار رکھتے ہیں۔

جب ان سے پوچھا گیا کہ کہا آپ سمجھتے ہیں کہ آپ نے چار اننگز سے ثابت کردیا کہ آپ کو ایک فارمیٹ کا سمجھنا درست نہیں تو عبداللہ شفیق نے کہا کہ وہ کسی اور کو مطمئن کرنے کیلئے نہیں بلکہ خود کے اطمینان کیلئے محنت اور کوشش کرتے ہیں کیوں کہ کھلاڑی کیلئے اہم یہ ہے کہ وہ خود اپنی پرفارمنس سے مطمئن ہو۔

عبداللہ شفیق نے کہا کہ ان کی کوشش ہوتی ہے کہ وہ ہر میچ میں کچھ نیا سیکھیں ، کبھی کسی کو دیکھ کر سیکھتے ہیں کبھی کسی سے پوچھ کر اپنا کھیل بہتر کرتے ہیں، فخر زمان اور سیم بلنگ اچھے کھلاڑی ہیں، ان سے قلندرز کے ڈگ آؤٹ میں سیکھنے کی کوشش کرتا ہوں اور وہ چیزیں حاصل کرنے کی کوشش ہوتی ہے جو مستقبل میں کام آسکیں۔

کوئٹہ کے کپتان سرفراز احمد کی پی ایس ایل کے بقیہ میچز میں شرکت مشکوک

سرفراز احمد کی لیگ کے کے بقیہ میچز میں شرکت کا فیصلہ اسکین کے بعد ہوگا

انہوں نے کہا کہ وہ پی ایس ایل میں اپنی ذاتی اور  مجموعی طور پر ٹیم کی کارکردگی سے کافی خوش ہیں، لاہور قلندرز  پلے آف میں کوالیفائی کرنے والی پہل ٹیم بنی جو کافی حوصلہ افزا بات ہے۔

عبداللہ شفیق نے کہا کہ شاہین شاہ آفریدی نے بہترین کپتانی کا مظاہرہ کیا ہے، شاہین ، بطور کپتان ہر کھلاڑی کو اعتماد دیتے ہیں ، پلیئرز سے جب پرفارم نہیں بھی ہورہا ہوتا تو اس کو اعتماد دیتے تاکہ اس کا حوصلہ ٹاپ پر ہو۔

نوجوان بیٹر نے کہا کہ ذاتی اہداف اپنی جگہ ہوتے ہیں لیکن ان کی کوشش ہے کہ وہ ایسی پرفارمنسز دیں جو ٹیم کے کام آسکیں، خواہش ہے کہ وہ ٹیم کی جیت میں زیادہ سے زیادہ کردار ادا کریں۔

عبداللہ شفیق نے ایک سوال پر کہا کہ لاہور قلندرز کو جو مومینٹم ملا ہوا ہے اس کو اگلے میچز میں بھی برقرار رکھنے کی کوشش کریں گے اور باقی تین میچز میں بھی اچھا پرفارم کریں گے، ٹیم میں اگر کوئی تبدیلی ہونی ہے تو اس کا فیصلہ منیجمنٹ کرے گی۔

انہوں نے کہا کہ لاہور قلندرز کا بولنگ اٹیک بہت زبردست ہے، حارث رؤف اور شاہین شاہ آفریدی کے ساتھ راشد خان جیسا بولر بھی ٹیم میں ہے، بطور بیٹر اچھی بات ہے کہ ان جیسے بولرز کا میچ میں سامنا نہیں کرنا پڑ رہا لیکن نیٹس پر ان ٹاپ بولرز کو کھیل کر میچز کی زبردست تیاری ہوجاتی ہے۔

ایک سوال پر عبداللہ شفیق نے کہا کہ فی الحال ان کا فوکس پاکستان سپر لیگ پر ہے اور وہ اس ٹورنامنٹ میں اپنی ٹیم کو جتوانا چاہتے ہیں، اس کے بعد کے اسائنمنٹس کے بارے میں زیادہ سوچا نہیں ہے۔