فلپائن کشتی میں آگ لگنے سے ہلاکتوں کی تعداد 28 ہوگئی
30 مارچ ، 2023
فلپائن کے جزیرے پر کشتی میں آگ لگنے کے واقعے سے ہلاکتوں کی تعداد 28 ہوگئی جبکہ 230 افراد کو ریسکیو کر لیا گیا۔
غیر ملکی میڈیا کے مطابق حکام کا کہنا ہے کہ رات دیر گئے کشتی کے ائیر کنڈیشن کیبن سے آگ لگی تھی تاہم ابھی تک یہ واضح نہیں ہو سکا کہ آگ لگنے کا واقعہ کیوں اور کیسے پیش آیا، واقعے سے ہلاک ہونے والوں میں تین چھوٹے بچے بھی شامل ہیں جو اپنے والدین سے بچھڑ گئے تھے۔
اس سے قبل حکام کا کہنا تھا کہ لاپتا افراد کی درست تعداد کا تعین نہیں ہو سکا ہے کیونکہ کشتی پر سوار مسافروں کے حتمی تعداد معلوم نہیں تاہم لسٹ کے مطابق کشتی پر صرف 205 افراد سوار تھے۔
صوبائی گورنر کے مطابق کشتی میں آگ لگنے کی وجہ سے خوف پھیل گیا اور زیادہ تر افراد نے جان بچانے کیلئے پانی میں چھلانگ لگائی جنہیں کوسٹ گارڈز نے ریسکیو کیا۔
گورنر کا کہنا تھا کہ’ ایم وی لیڈی میری جوئے‘ نامی کشتی سے زیادہ تر افراد کو ریسکیو کرلیا گیا ہے تاہم اہلکار احتیاطی تدابیر کے تحت مزید سرچ آپریشن کر رہے ہیں۔
رپورٹس کے مطابق کشتی صوبہ سولو سے جولو ٹاؤن کی جانب روانہ ہوئی تھی جہاں باسلن جزیرے کے قریب اس میں آگ بھڑک اٹھی۔
