عمران خان اور بشریٰ بی بی کیخلاف عدت کے دوران نکاح کا کیس، نکاح خوان کا بیان سامنے آگیا

چیئرمین تحریک انصاف عمران خان اور  بشریٰ بی بی کے خلاف عدت کے دوران نکاح کے الزام کے کیس میں نکاح خوان مفتی محمد سعید کا عدالت میں جمع کروایاگیا بیان سامنے آگیا ہے۔

عدت کے دوران نکاح کا الزام: عمران خان اور اہلیہ کیخلاف کارروائی کیلئے درخواست دائر

اسلام آباد کی ڈسٹرکٹ اینڈ سیشن کورٹ میں شہری محمد حنیف نے درخواست دائر کی جس میں عمران خان، بشریٰ بی بی اور ریاست کو فریق بنایا گیا ہے۔

نکاح خوان مفتی محمد سعید نے نکاح سے متعلق بیان 18جنوری 2023 کو دیا۔ اپنے بیان میں مفتی سعید نے کہا کہ جنوری 2018 میں لاہور ڈیفنس میں عمران خان اور بشریٰ بی بی کا نکاح پڑھایا،  عون چوہدری اور ذلفی بخاری بطور دو گواہان نکاح کی تقریب میں شریک ہوئے۔

مفتی سعید نے بیان میں کہا کہ انہوں نے نکاح سے قبل دریافت کیا کہ بشرٰی بی بی شرعی طور  پر نکاح کے قابل ہیں یا نہیں، بشرٰی بی بی کے ہمراہ موجود خواتین کا جواب ملنے کے بعد ان کا نکاح عمران خان سے پڑھادیا۔

عمران خان اور بشریٰ بی بی کا نکاح دو مرتبہ پڑھائے جانے کا انکشاف

یہ انکشاف پی ٹی آئی کی کور کمیٹی کے رکن اور نکاح خوان مفتی سعید خان نے جیو نیوز کے پروگرام ’جرگہ‘ میں کیا

مفتی سعید نے بتایا کہ بعد میں مختلف ذرائع سے معلوم ہوا کہ بشرٰی بی بی نے سابقہ شوہر سے طلاق کے بعد عدت پوری نہیں کی جس کے بعد انہوں نے ایک ماہ بعد عمران خان اور بشریٰ بی بی کو  دوبارہ طلب کیا  اور بشرٰی بی بی کا شرعی طور پر عدت پوری ہونے کے بعد دوبارہ نکاح پڑھایا۔

خیال رہے کہ جوڈیشل مجسٹریٹ نصرمن اللہ اس معاملے پر 8 اپریل کو سماعت کریں گے۔