صحت و سائنس

نیند کے مسائل فالج کے خطرے کو 5 گنا بڑھا سکتے ہیں: تحقیق

06 اپریل ، 2023

نیند نہ آنے کی وجہ سے ٹہلنا، کروٹیں لینا، رات کو جاگنا اور بہت کم یا بہت زیادہ سونا یہ سب نیند کے خراب معیار کے سبب ہیں: تحقیق/ فائل فوٹو

کیا آپ نیند کے مسائل سے دوچار ہیں ؟کیا آپ کو وقت پر نیند نہیں آتی؟ تو یہ خطرے کی علامت بھی ہوسکتی ہے کیونکہ ایک تحقیق میں بتایا گیا ہے کہ نیند کے مسائل فالج کے خطرے کو 5 گنا تک بڑھا دیتے ہیں۔

یہ تحقیق آئر لینڈ کی ایک یونیورسٹی کی جانب سے کی گئی ہے جس میں 4 ہزار 500 لوگوں نے حصہ لیا۔

یہ بھی پڑھیں

تحقیق کے مطابق خراٹے لینا، نیند نہ آنے کی وجہ سے ٹہلنا، کروٹیں لینا، رات کو جاگنا اور بہت کم یا بہت زیادہ سونا یہ سب نیند کے خراب معیار کے سبب ہیں جو آپ کو فالج کے خطرے میں مبتلا کرسکتے ہیں۔

تحقیق میں بتایا گیا کہ خراب نیند ہائی بلڈپریشرکی وجہ بھی بنتی ہے جب کہ خون کی نالیوں میں خرابی پیدا کرتی ہے جو فالج کا سبب بنتی ہے، اس کے علاوہ خراب نیند دل کو بھی نقصان پہنچاتی ہے۔

رپورٹ کے مطابق نتائج سے معلوم ہوا کہ جو لوگ رات میں اوسطاً 5 گھنٹے سے کم سوتے ہیں ان میں فالج کا خطرہ ان لوگوں کے مقابلے میں 3 گنا زیادہ ہوتا ہے جنہوں نے 7 گھنٹے کی نیند لی تھی۔

پرسکون نیند کیلئے کیا کیا جائے؟

ماہرین کے مطابق صحت مند کھانے کے ساتھ صحت مند طرز زندگی کو اپنانا بہت ضروری ہے، پرسکون نیند کیلئے روزانہ ورزش کرنا لازم ہے جو فالج اور دل کی بیماریوں میں مبتلا ہونے کے خطرے کو کم کردیتی ہے۔

ماہرین کی جانب سے بتایا گیا ہے الکوحل کے استعمال کو ترک کرنا چاہیے اور سونے سے تین گھنٹہ پہلے کھانے کا اہتمام کرنا چاہیے تاکہ آپ پر سکون نیند سو سکیں۔