پاکستان اور نیوزی لینڈ کے درمیان سیریز کا دوسرا ون ڈے آج کھیلا جائے گا

پاکستان اور نیوزی لینڈ کے درمیان سیریز کا دوسرا ون ڈے انٹرنیشنل آج راولپنڈی ہی میں کھیلا جائے گا۔

پانچ میچز کی سیریز میں پاکستان ٹیم کو ایک صفر کی برتری حاصل ہے ،پہلے ون ڈے میں پاکستان نے نیوزی لینڈ کو با آسانی 5 وکٹوں سے شکست دی تھی۔

راولپنڈی میں کھیلے گئے پہلے ون ڈے میں ابتدا میں تو کیوی بیٹرز نے شاندار بیٹنگ کی ، ول ینگ نے 86رنز بنائے ، ڈیرل مچل نے سنچری اسکور کی پھر پاکستانی بولرز نے اچھا کم بیک کیا اور کیویز کو 7 وکٹ پر 288رنز تک محدود کیا۔

پہلا ون ڈے: فخر کی شاندار سنچری، پاکستان نے نیوزی لینڈ کو 5 وکٹوں سے شکست دیدی

فخر زمان نے 13 چوکوں اور ایک چھکے کی مدد سے 117 رنز کی اننگز کھیلی، امام الحق نے بھی 60 رنز بنائے

جواب میں فخر زمان اور امام الحق نے 124رنز کی اوپننگ شراکت بنا کر جیت آسان بنادی ، امام 60 رنز بنا گئے ، فخر زمان نے شاندار سنچری بنائی ، بابر نے 49 اور پھر رضوان نے 42رنز کی شاندار اننگز کھیلی اورپاکستان کو پانچ وکٹ سے فتح دلا دی ۔

سیریز کا دوسرا میچ آج راولپنڈی اسٹیڈیم ہی میں کھیلا جائے گا ، دونوں ٹیموں نے میچ کی تیاری کے بجائے آرام کو ترجیح دی ۔

میچ پاکستانی وقت کے مطابق سہہ پہر ساڑھے تین بجے شروع ہوگا۔