واٹس ایپ کا نیا فیچر جو اس کے استعمال کا تجربہ بدل دے گا

واٹس ایپ کے یوزر انٹرفیس میں ایسی تبدیلی کی گئی ہے جو اس ایپ کے استعمال کا تجربہ بدل دے گی۔

WABetaInfo کی رپورٹ کے مطابق اینڈرائیڈ صارفین کے لیے واٹس ایپ کے یوزر انٹرفیس میں تبدیلی کے بعد اوپر موجود ٹیبز نیچے منتقل کی جا رہی ہیں۔

اس تبدیلی کے بعد اینڈرائیڈ ڈیوائسز میں واٹس ایپ کا ڈیزائن نمایاں حد تک بدل جائے گا یا یوں کہہ لیں کہ بالکل نیا محسوس ہونے لگے گا۔

اس ڈیزائن میں اوپر موجود چیٹس، کمیونٹیز، اسٹیٹس اور کالز کے ٹیب نیچے منتقل کر دیے جائیں گے جو کافی زیادہ بہتر محسوس ہوتے ہیں۔

واٹس ایپ کا 2023 کا سب سے بڑا فیچر طویل انتظار کے بعد صارفین کو دستیاب

اس فیچر پر لگ بھگ 2 سال سے کام کیا جا رہا تھا اور اب جا کر اسے متعارف کرایا گیا ہے۔

آئی او ایس ڈیوائسز کے لیے اس طرح کا یوزر انٹرفیس کافی عرصے سے استعمال کیا جارہا ہے مگر اینڈرائیڈ میں کئی برس بعد ایپ کے ڈیزائن کو تبدیل کیا جا رہا ہے۔

اس وقت یہ نیا فیچر اینڈرائیڈ ڈیوائسز کے نئے بیٹا (beta) ورژن میں کچھ صارفین کو دستیاب ہے۔

اس تبدیلی سے صارفین کو ایپ کے مختلف سیکشنز کی نیوی گیشن میں زیادہ مدد مل سکے گی۔

کچھ عرصے قبل بھی اس فیچر کے بارے میں رپورٹ سامنے آئی تھی مگر اس وقت یہ تیاری کے مرحلے سے گزر رہا تھا اور اب اسے بیٹا ورژن کا حصہ بنا دیا گیا ہے۔

خیال رہے کہ اینڈرائیڈ صارفین کی جانب سے کافی عرصے سے واٹس ایپ کے یوزر انٹرفیس میں تبدیلی کا مطالبہ کیا جا رہا تھا۔

اس تبدیلی سے عندیہ ملتا ہے کہ واٹس ایپ کی جانب سے صارفین کے مطالبات کو تسلیم کیا جاتا ہے اور اس کے مطابق تبدیلیاں کی جاتی ہیں۔

جیسا اوپر درج کیا جاچکا ہے کہ اس وقت یہ فیچر بیٹا ورژن کے کچھ صارفین کو دستیاب ہے تو ابھی یہ کہنا مشکل ہے کہ تمام صارفین کی ایپ میں یہ تبدیلی کب تک آسکتی ہے۔

خیال رہے کہ اس سے قبل واٹس ایپ نے بیک وقت 4 فونز پر اکاؤنٹ کو استعمال کرنے کا فیچر متعارف کرایا تھا۔

اسی طرح ڈس اپیئرنگ میسج فیچر کو بھی بہتر بنایا گیا تھا جس کے تحت صارفین ایسے میسج محفوط کر سکیں گے۔