وہ نئی ٹیکنالوجی جو بل گیٹس کے مطابق گوگل سرچ کا خاتمہ کردے گی

23 مئی ، 2023

ایک کانفرنس کے دوران بل گیٹس نے یہ پیشگوئی کی / رائٹرز فوٹو

گوگل سرچ انجن کو انٹرنیٹ کا حکمران تصور کیا جاتا ہے مگر ایک نئی ٹیکنالوجی بہت جلد اس کے خاتمے کا باعث بن جائے گی۔

یہ پیشگوئی مائیکرو سافٹ کے شریک بانی بل گیٹس نے کی۔

سان فرانسسکو میں ایک کانفرنس سے خطاب کرتے ہوئے بل گیٹس نے خیال ظاہر کیا کہ اگر آرٹی فیشل انٹیلی جنس (اے آئی) ٹیکنالوجی کا ارتقا موجودہ رفتار سے جاری رہا تو مستقبل قریب میں گوگل سرچ اور ایمازون جیسی سروسز ماضی کا قصہ بن جائیں گی۔

ان کا ماننا ہے کہ اے آئی ٹیکنالوجی ابھی بھی مستقبل کی معیشت کو تبدیل کر رہی ہے۔

یہ بھی پڑھیں

انہوں نے کہا کہ اگر ایک نیا اے آئی ٹول انسانی سوچ کے انداز، ضروریات اور احساسات کو سمجھنے کے قابل ہو گیا تو اس سے انسانی رویے تبدیل ہو جائیں گے۔

بل گیٹس نے کہا کہ 'آپ پھر کبھی سرچ سائٹ پر نہیں جائیں گے، آپ کبھی ایمازون کا رخ نہیں کریں گے'۔

اے آئی کے شعبے میں کمپنیوں کے درمیان مسابقت کے باوجود بل گیٹس نے توقع ظاہر کی کہ مائیکرو سافٹ کی جانب سے انقلاب برپا کرنے والے اے آئی ٹول کی تیاری میں قائدانہ کردار ادا کیا جائے گا۔

انہوں نے مزید کہا کہ 'مجھے اس وقت مایوسی ہوگی اگر مائیکرو سافٹ ایسا نہ کرسکے'۔

تاہم ان کا کہنا تھا کہ طاقتور اے آئی ٹولز سے بڑی ٹیکنالوجی کمپنیوں کے بزنس ماڈلز متاثر ہوں گے۔

انہوں نے یہ بھی انتباہ کیا کہ مستقبل میں اے آئی ٹیکنالوجی سے لیس روبوٹس لوگوں کو ملازمتوں سے محروم کر سکتے ہیں۔

مائیکرو سافٹ کے شریک بانی کے مطابق اس طرح کی اے آئی ٹیکنالوجی صنعتی کاموں کے لیے سستی اور مؤثر ثابت ہوگی جبکہ وائٹ کالر ملازمتیں کرنے والے افراد کو بھی اس ٹیکنالوجی سے خطرے کا سامنا ہوگا۔