ایپل کے پہلے مکسڈ رئیلٹی ہیڈ سیٹ کی قیمت کیا ہوگی؟

05 جون ، 2023

ایپل کی جانب سے 8 برس بعد پہلی نئی ڈیوائس سالانہ ڈویلپر کانفرنس میں متعارف کرائی جا رہی ہے۔

5 جون سے شروع ہونے والی کانفرنس کے موقع پر آئی فون تیار کرنے کے لیے مشہور کمپنی کی جانب سے پہلا مکسڈ رئیلٹی ہیڈ سیٹ متعارف کرایا جائے گا۔

اس ڈیوائس کی قیمت 3 ہزار ڈالرز تک ہو سکتی ہے۔

اس ہیڈ سیٹ میں ورچوئل رئیلٹی (وی آر) اور اگیومینٹڈ رئیلٹی (اے آر) ٹیکنالوجیز کا امتزاج کیا جائے گا۔

یہ بھی پڑھیں

2015 میں ایپل واچ کے بعد یہ ایپل کی جانب سے پہلی بڑی نئی ڈیوائس متعارف کرائی جا رہی ہے جو کمپنی کے نئے عہد کا آغاز بھی کرے گی۔

کئی برس سے ایپل کے چیف ایگزیکٹو ٹم کک کی جانب سے اے آر ٹیکنالوجی میں دلچسپی ظاہر کی جا رہی ہے اور اب جاکر اس پر مبنی پہلی ڈیوائس پیش کی جا رہی ہے۔

اس ڈیوائس کو رئیلٹی ون یا رئیلٹی پرو کا نام دیے جانے کا امکان ہے جس میں آئی او ایس جیسا یوزر انٹرفیس ہوگا۔

ڈیوائس میں کیمرے اور سنسرز کو صارفین اپنے ہاتھوں، آنکھوں کی حرکت اور ڈیجیٹل اسسٹنٹ Siri کی مدد سے کنٹرول کر سکیں گے۔

اس ہیڈ سیٹ میں گیمنگ اور فٹنس ایپس موجود ہوں گی جبکہ صارفین آئی فون کی ایپس جیسے میسجز، فیس ٹائم اور سفاری تک بھی رسائی حاصل کر سکیں گے۔

اس کانفرنس کے دوران ایپل کی جانب سے نئے میک بک کمپیوٹرز، آئی فون، آئی پیڈ اور ایپل واچ کے لیے نئے فیچرز متعارف کرائے جانے کا بھی امکان ہے۔

اسی طرح آرٹی فیشل انٹیلی جنس (اے آئی) ٹیکنالوجی کے حوالے سے بھی اہم اعلانات متوقع ہیں۔