کھیل

ورلڈکپ: پاکستان احمد آباد میں فائنل کے سوا کوئی میچ نہیں کھیلے گا: پی سی بی ڈٹ گیا

08 جون ، 2023

بی سی سی آئی پاکستان کا بھارت کے خلاف میچ نریندر مودی اسٹیڈیم احمد آباد میں شیڈول کرنا چاہتا ہے: بھارتی میڈیا/ فائل فوٹو

پاکستان کرکٹ بورڈ نے احمد آباد میں ورلڈ کپ کے میچز کھیلنے پر تحفظات کا اظہار کردیا۔

بھارتی میڈیا کے مطابق بی سی سی آئی پاکستان کا بھارت کے خلاف میچ نریندر مودی اسٹیڈیم احمد آباد میں شیڈول کرنا چاہتا ہے۔

بھارتی میڈیا پر شائع رپورٹ میں پی سی بی کے سینئر ذرائع کا حوالہ دیتے ہوئے بتایا گیا ہے کہ نجم سیٹھی نے چیئرمین آئی سی سی گریک بارکلے کو واضح کردیا ہے کہ بھارت میں منعقد کیے جانے والے ورلڈکپ 2023 کے ایونٹ کیلئے پاکستان ٹیم احمد آباد میں سوائے فائنل میچ کے کوئی میچ نہیں کھیلےگی، پاکستان نہیں چاہتا کہ اس کے میچ احمد آباد میں شیڈول کیے جائیں تاہم اگر ہمیں کوئی فائنل میچ وہاں کھیلنا پڑے تو اس پر کوئی اعتراض نہیں۔

یہ بھی پڑھیں

بھارتی میڈیا کے مطابق پاکستان نے اس سے قبل ورلڈکپ کے شیڈول میچز کولکتہ، چنئی اور بنگلورو میں کھیلنے کی خواہش کا اظہار کیا تھا۔

نجم سیٹھی نے آئی سی سی سے درخواست کی ہے کہ ’ اگر حکومت پاکستان قومی ٹیم کو اکتوبر اور نومبر میں شیڈول عالمی ایونٹ کے لیے بھارت جانے کی اجازت دیتی ہے تو پھر پاکستان کے میچز کو چنئی، بنگلورو اور کولکتہ میں شیڈول کیا جائے ‘۔

واضح رہے کہ گزشتہ ہفتے نجم سیٹھی اور سربراہان آئی سی سی کی لاہور میں ملاقات ہوئی تھی۔

دوسری جانب ستمبر میں پاکستان میں منعقد کیے جانے والے ایشیا کپ کیلئے بھارت نے پاکستان آنے سے انکار کردیا ہے، اس بات کے امکانات ہیں کہ پاکستان بھی ورلڈکپ کیلئے بھارت نہ جائے، پاکستان کی میزبانی میں ہونے والے ایشیا کپ میں بھارت کی شرکت کا فیصلہ رواں ماہ کے آخر تک متوقع ہے۔