ٹک ٹاک کی سرپرست کمپنی چیٹ جی پی ٹی جیسا چیٹ بوٹ متعارف کرانے کیلئے تیار

12 جون ، 2023

ٹک ٹاک کی سرپرست کمپنی بائیٹ ڈانس کی جانب سے چیٹ جی پی ٹی جیسے آرٹی فیشل انٹیلی جنس (اے آئی) ٹیکنالوجی پر مبنی چیٹ بوٹ کو تیار کیا جا رہا ہے۔

اس چیٹ بوٹ پراجیکٹ کا کوڈ نام گریس رکھا گیا ہے اور یہ لارج لینگوئج ماڈلز (ایل ایل ایم) پر مبنی ہے۔

کمپنی کے ایک عہدیدار نے بتایا کہ یہ ایک تجرباتی اے آئی چیٹ بوٹ ہے جو ابتدائی مراحل سے گزر رہا ہے اور کمپنی کے اندر اس کی آزمائش کی جا رہی ہے۔

کمپنی کے محدود افراد اس اے آئی بوٹ کی آزمائش کر رہے ہیں۔

دنیا بھر میں چیٹ جی پی ٹی کی کامیابی کے بعد متعدد ٹیکنالوجی کمپنیوں کی جانب سے اس حوالے سے کام کیا جا رہا ہے۔

گوگل، مائیکرو سافٹ اور دیگر کمپنیوں کے بعد بائیٹ ڈانس اور ٹک ٹاک کی جانب سے جنریٹیو اے آئی ٹیکنالوجی کے شعبے میں قدم جمانے کی کوشش کی جا رہی ہے۔

اس سے قبل ٹک ٹاک کی جانب سے مئی میں ایک چیٹ بوٹ ٹاکو کو فلپائن میں متعارف کرانے کا اعلان کیا گیا تھا۔

یہ چیٹ بوٹ صارفین کو ٹک ٹاک میں مواد ڈھونڈنے میں مدد فراہم کرنے کے لیے تیار کیا گیا ہے۔

دنیا بھر میں ٹک ٹاک کی کامیابی کا راز اس کے الگورتھم میں چھپا ہے جو صارفین کی پسند کے مواد کو ویڈیو فیڈ پر شو کرتا ہے۔

اس الگورتھم کے لیے اے آئی ٹیکنالوجی کی مدد لی جاتی ہے اور اسے اے آئی ریکومینڈیشن سسٹم کہا جاتا ہے۔

سوشل میڈیا کمپنی کی جانب سے ویڈیوز کی تیاری کے لیے بھی اے آئی ٹیکنالوجی پر مبنی فلٹرز اور ایفیکٹس صارفین کو فراہم کیے گئے ہیں۔

مزید خبریں :