بھارتی ٹی وی کے اداکاروں میں سب سے زیادہ معاوضہ کون اور کتنا لیتا ہے؟

گزشتہ کچھ عرصے میں جہاں بالی وڈ انڈسٹری ترقی کی منزلیں طے کرتی ہوئی اونچائیوں پر پہنچی وہیں بھارتی ٹیلی ویژن پر آنے والے ڈراموں میں بھی جدت دیکھی گئی اور یہ ہی وجہ ہے کہ اب بھارتی ٹیلی ویژن کے اداکاروں کے معاوضے پہلے جیسے نہیں ہوتے۔

آج سے تقریباً 4 یا 5 سال پہلے تک اداکاروں کو اچھی خاصی محنت کرنی پڑتی تھی جس کے کئی عرصے بعد جاکر وہ اپنا نام اور بینک بیلنس بنانے میں کامیاب ہوتے تھے اور اگر کسی کا ڈرامہ فلاپ ہوگیا تو اسے مزید محنت کرنا پڑتی تھی۔

بھارتی میڈیا کے مطابق حالیہ دنوں میں ٹیلی ویژن پر ناصرف ٹی وی ڈراموں کی تعداد میں اضافہ ہوا ہے بلکہ کئی رئیلیٹی شوز، کامیڈی شوز اور گیم شوز وغیرہ بھی ناظرین کے لیے پیش کیے جانے لگے ہیں۔

یعنی اب اداکاروں کے پاس کمانے کا ذریعہ صرف ڈرامے نہیں بلکہ ٹی وی شوز بھی ہیں، یہ ہی وجہ ہے کہ اب اس سوشل میڈیا کے دور میں اداکاروں کی مانگ بڑھ گئی ہے۔

زیادہ تر بھارتی ٹیلی ویژن پر نشر کیے جانے والے رئیلیٹی شوز بالی وڈ کے سپر اسٹارز کرتے ہیں اور یہ غیر متوقع نہیں کہ سب سے زیادہ معاوضہ لینے والی ٹی وی شخصیات بنیادی طور پر سپر اسٹار ز ہی ہیں جو ان شوز کی میزبانی کرتے ہیں۔

جیسے لاک اپ کی میزبانی کنگنا رناوت کرتی ہیں، کون بنے گا کروڑ پتی کے لیے امیتابھ بچن، کافی ود کرن کو کرن جوہر اور بگ باس کو سلمان خان ہوسٹ کرتے ہیں۔

اس کے علاوہ بھارت کا مقبول شو کپل شرما شو کپل ہوسٹ کرتے ہیں۔

بھارتی میڈیا کی رپورٹ کے مطابق اگر سلمان خان کی بات کی جائے تو ان کے حوالے سے اطلاعات تھیں کہ انہوں نے بگ باس 16 کے پورے سیزن کے 1000 کروڑ بھارتی روپے وصول کیے۔

سلمان خان ہر ہفتے (دو اقساط) کے 25 کروڑ بھارتی روپے لیتے تھے یعنی ایک قسط کی میزبانی کے سلمان نے 12.5 کروڑ بھارتی روپے لیے، اسی لیے وہ بھارتی ٹیلی ویژن کے سب سے زیادہ معاوضہ وصول کرنے والے اداکار قرار پائے۔

بھارت کے معروف اداکار کتنا معاوضہ لیتے ہیں؟

چونکہ رئیلیٹی شوز اور ڈراموں میں زمین آسمان کا فرق ہوتا ہے، ڈرامہ طویل عرصہ تک چلتے ہیں، اسی لیے ٹی وی ڈراموں کے اداکاروں کی فیس کا رئیلیٹی شوز کے میزبانوں سے کوئی مقابلہ نہیں۔

حنا خان:

معروف بھارتی ڈرامہ 'یہ رشتہ کیا کہلاتا ہے' سے شہرت پانے والی حنا خان سے متعلق بتایا گیا ہے کہ وہ اپنے ڈرامے کی ایک قسط کے تقریباً ڈیڑھ لاکھ یا اس سے کچھ زیادہ بھارتی روپے لیتی ہیں۔ 

رام کپور:

ڈرامہ سیریل 'بڑے اچھے لگتے ہیں' میں مرکزی کردار نبھانے والے رام کپور سے متعلق بھی اطلاعات ہیں کہ وہ ایک قسط کے ڈیڑھ لاکھ بھارتی روپے لیتے ہیں۔

رونت بوس رائے:

اسٹار پلس کے ڈرامے 'کسوٹی زندگی کی' میں مسٹر بجاج کے کرداراور کیونکہ ساس بھی کبھی بہو سے شہرت کی بلندیوں پر پہنچنے والے رونت بوس رائے بھی ایک قسط کے تقریباً ڈیڑھ لاکھ بھارتی روپے معاوضہ وصول کرتے ہیں۔

روپالی گنگولی:

ٹی وی ڈراموں کے اداکاروں میں سب سے زیادہ معاوضہ لینے والی اداکارہ روپالی گنگولی ہیں جن کا ڈرامہ انوپما کافی ہٹ ہے۔

روپالی ڈرامے کی ایک قسط کے 3 ملین یعنی 30 لاکھ بھارتی روپے لیتی ہیں۔