آئی فون 15 سیریز متعارف کرائے جانے کی تاریخ جان لیں

18 جون ، 2023

ایپل کی جانب سے 2023 میں آئی فون 15 سیریز کو متعارف کرایا جائے گا مگر کمپنی کی جانب سے ابھی تک یہ واضح نہیں کیا کہ کب یہ اسمارٹ فونز صارفین کو دستیاب ہوں گے۔

مگر ایپل کی جانب سے عموماً ستمبر کے مہینے میں نئے آئی فونز متعارف کرائے جاتے ہیں۔

تو زیادہ امکان یہی ہے کہ آئی فون 15، 15 پلس، 15 پرو اور 15 پرو میکس (یا آئی فون 15 الٹرا) ستمبر میں متعارف کرائے جائیں گے۔

ایپل کی جانب سے آئی فون 15 سیریز متعارف کرنے کے ایونٹ کا اعلان ممکنہ طور پر اگست میں کیا جائے گا۔

یہ بھی پڑھیں

مگر کمپنی کے ماضی کے ایونٹس دیکھ کر اندازہ لگایا جا سکتا ہے کہ ستمبر کی کس تاریخ کو یہ فون پیش کیے جا سکتے ہیں۔

ایپل کی جانب سے عموماً ستمبر کے پہلے یا دوسرے ہفتے میں نئے آئی فونز متعارف کرائے جاتے ہیں اور اکثر منگل کا دن منتخب کیا جاتا ہے، مگر کبھی کبھار بدھ کو بھی نئی ڈیوائسز پیش کی جاتی ہیں۔

2022 میں آئی فون 14 سیریز کو 7 ستمبر کو متعارف کرایا گیا تھا اور نئے ماڈلز ایک ہفتے بعد جمعے کے دن فروخت کے لیے پیش کیے گئے تھے۔

اس کا مطلب یہ ہے کہ رواں سال اگر آئی فون 15 سیریز کو منگل کے دن پیش کیا گیا تو وہ 5 یا 12 ستمبر کو متعارف کرائی جاسکتی ہے، بدھ کا دن منتخب کرنے پر یہ تاریخیں 6 یا 13 ستمبر ہو سکتی ہیں۔

اگر آئی فون 15 سیریز 5 یا 6 ستمبرکو متعارف کرائے جاتے ہیں تو وہ صارفین کو 15 ستمبر کو دستیاب ہوں گے۔

اسی طرح 12 یا 13 ستمبر کو یہ فونز پیش کیے جاتے ہیں تو یہ مارکیٹ میں 22 ستمبر کو دستیاب ہوں گے۔